ნეტგაზეთი • RU

არ შეგეშინდეთ „რუსული დათვის“, არ გაექცეთ ბრძოლას – პოდოლიაკი

„არ შეგეშინდეთ „რუსული დათვის“, არ გაექცეთ ბრძოლას, გჯეროდეთ უკრაინის“, – უკრაინის პრეზიდენტის მრჩეველი, მიხაილო პოდოლიაკი ქალაქ ხერსონიდან რუსული არმიის გასვლას ეხმიანება.

„თებერვალში ზოგიერთი ფიქრობდა, რომ უკრაინის არმია „სამ დღეზე“ მეტ ხანს ვერ გაძლებდა. ამ დროისთვის: დაიცვა კიევი, გაათავისუფლა სამი რეგიონი, მოახდინა ხარკოვის დეოკუპაცია და მივიდა ხერსონთან. ბოლო ცხრა თვემ ყველას უნდა ასწავლოს: არ შეგეშინდეთ „რუსული დათვის“, არ გაექცეთ ბრძოლას, გჯეროდეთ უკრაინის“.

BBC-ის ცნობით, უკრაინის თავდაცვის სამინისტრო აცხადებს, რომ ქალაქ ხერსონს „თითქმის სრულად აკონტროლებს”.

11 ნოემბერს სოციალურ ქსელებში ვრცელდება უკრაინელი ჯარისკაცების ვიდეოები და ფოტოები ხერსონის სხვადასხვა რაიონიდან, ისევე როგორც ქალაქ ხერსონის მთავარი მოედნიდან, სადაც ჩანს, როგორ აღმართავენ უკრაინის დროშებს და აღნიშნავენ რუსული არმიის ტერიტორიიდან გასვლას.

რუსეთის თავდაცვის მინისტრმა, სერგეი შოიგუმ, ხერსონის დასავლეთ ნაწილიდან ჯარების გაყვანის ბრძანება 9 ნოემბერს გასცა. მინისტრმა ეს გადაწყვეტილება უკრაინაში რუსეთის ძალების მეთაურის, სერგეი სუროვიკინის მოხსენების მოსმენის შემდეგ გამოაცხადა.

__________

მთავარი ფოტო: უკრაინის პრეზიდენტის მრჩეველი, მიხაილო პოდოლიაკი; „დოიჩე ველე“.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან