ეროვნული ბიბლიოთეკის ციფრულ ფოტოარქივში 3 ფოტო იძებნება, რომელიც 1905 წლით არის დათარიღებული. ორი ფოტო ბათუმის ბაზარშია გადაღებული, ერთ ფოტოზე კი ცნობილი მწერალი, დავით კლდიაშვილია გამოსახული ოფიცრების ჯგუფთან ერთად.
ფოტოზე „თურქული ბაზარია“, რომელიც დღევანდელი ჭავჭავაძის ქუჩის დასაწყისში მდებარეობდა, მოედანზე. ფოტოები ერთი და იმავე ადგილზეა გადაღებული, ჩანს ფეხსაცმლის მწმენდავები, სავარაუდოდ, გამყიდველი – თეთრი წინსაფრით, ფოტოატელიეს აბრა, კაცები და ბავშვები.
ბათუმის ბაზარი. 1905 წელი. ფოტო: ივერიელი
ბათუმის ბაზარი. 1905 წელი. ფოტო: ივერიელი
ამ ფოტოზე კი დავით კლდიაშვილს ხედავთ [ზედა რიგში მარცხნიდან მეორე] ოფიცრებთან ერთად. ცნობილი მწერალი იმ ხანად ბათუმში მსახურობდა.
დავით კლდიაშვილი ოფიცრებთან ერთად ბათუმში
1905 წლის ნოემბერში, ზუსტად 117 წლის წინ ბათუმში ერთი დრამატული ამბავი მოხდა. იმ წლის 28 ნოემბერს თურქულ ბაზარში ქუჩაში ვიღაცას ერთი კაზაკისთვის თოფი წაურთმევია, მოკლე ხანში კი კაზაკების რაზმი ბაზარში შეიჭრა, დახლებს დაერივნენ და მოვაჭრეების ხიშტებით ჩეხვა დაიწყეს. 11 ადამიანი დაიღუპა მაშინ. ბათუმში იმავე საღამოს მიტინგი გაიმართა, რომლის მოთხოვნაც იყო, სასწრაფოდ გაეყვანათ კაზაკები ბათუმიდან. აქციები, დაპირისპირება და სროლა ბათუმში მაშინ სამ დღეს გაგრძელდა, გაიზარდა დაღუპულთა რაოდენობაც, თუმცა კაზაკები ქალაქიდან არ გაუყვანიათ.
ამ ამბის შესახებ ვრცლად შეგიძლიათ წაიკითხოთ „ბათუმელების“ მიერ გამოცემულ წიგნში „ბათომი“, რომლის ავტორი შოთა გუჯაბიძეა.
