მთავარი,სიახლეები

პოლიციელებს ბათუმში ბინები 2 წლის წინ უნდა მიეღოთ, შსს-ს მშენებლობა ჯერაც არ დაუსრულებია

09.11.2022 •
პოლიციელებს ბათუმში ბინები 2 წლის წინ უნდა მიეღოთ, შსს-ს მშენებლობა ჯერაც არ დაუსრულებია

ბათუმში პოლიციელებისთვის მშენებარე ბინების დასრულებაზე შინაგან საქმეთა სამინისტრომ ხელახალი ტენდერი გამოაცხადა. სატენდერო თანხა ამჯერად 4 468 315 ლარია.

ბათუმში, ადლიის ქ. N112-ში, შინაგან საქმეთა სამინისტროს თანამშრომელთათვის ორი თერთმეტსართულიანი, მრავალბინიანი საცხოვრებელი კორპუსების მშენებლობა 2020 წელში უნდა დასრულებულიყო და პოლიციელებს ბინებიც უნდა მიეღოთ.

მიუხედავად ამისა, კორპუსების მშენებლობაზე შსს-მ  ტენდერში გამარჯვებული ორი კომპანია ამუშავა, თუმცა ხელშეკრულება ორივესთან შეწყვიტა და, შესაბამისად, მშენებლობა კვლავ დაუსრულებელია.

შსს-ს დაუსრულებელი კორპუსები ბათუმში, ადლიის დასახლებაში / ფოტო ტენდერიდან

ადლიაში კორპუსების მშენებლობა 2018 წელს კომპანია „აიდურგეომ“ დაიწყო, რომელსაც შსს-მ 2 639 600 ლარი გადაურიცხა; შემდეგ მშენებლობის დასრულებაზე მუშაობდა სხვა კომპანია – „კასპიისპირეთის სამმართველო“, რომელთანაც ხელშეკრულება სამინისტრომ 2022 წლის ივნისში [ხელშეკრულების პირობების შეუსრულებლობის გამო] შეწყვიტა, ივლისში კი, ამავე კომპანიას 595 562 ლარი გადაურიცხა [შესრულებული სამუშაოს ღირებულება].

2021 წლის მაისში გაფორმებული ხელშეკრულებით, „კასპიისპირეთის სამმართველოს“ სამუშაოები 2 843 944 ლარის ფარგლებში უნდა დაესრულებინა.

მიუხედავად იმისა, რომ ამ კომპანიამ [შესყიდვების პორტალზე ატვირთული დოკუმენტების მიხედვით] ნახევარი მილიონი ლარის სამუშაო შეასრულა, შსს-მ მშენებლობის დასრულებაზე ტენდერი ამჯერად 4,4 მილიონი ლარით გამოაცხადა [თავდაპირველი გათვლებით კი ორი კორპუსი სამინისტროს 6 599 000 ლარად უნდა დაესრულებინა].

დოკუმენტების მიხედვით, ამ დროისთვის სამინისტროს 3,4 მილიონი ლარი უკვე დახარჯული აქვს. მთლიანობაში რამდენით გაძვირდება პროექტი, ამ ტენდერის დასრულების შემდეგ გამოჩნდება, სადაც წინადადებების მიღება 2022 წლის 4 დეკემბერს დაიწყება და ხუთ დღეში, 9 დეკემბერს დასრულდება.

ტენდერის პირობის მიხედვით, გამარჯვებულმა კორპუსების მშენებლობა ხელშეკრულების გაფორმებიდან 200 დღეში უნდა დაასრულოს.

აღნიშნული კორპუსების მშენებლობის დასრულების ვადებთან დაკავშირებით „ბათუმელებმა“ შსს-ს ოფიციალური წერილით 2022 წლის 29 სექტემბერს მიმართა. სამინისტროდან პასუხი კი, ამ დრომდე არ მიგვიღია.

შსს-ს კორპუსები ბათუმში / რენდერი პროექტიდან

ტენდერების/მშენებლობის დეტალები მოკლედ:

  • ბათუმში, ადლიის ქუჩა N112-ში შინაგან საქმეთა სამინისტროს თანამშრომლებისთვის ორი 11-სართულიანი საცხოვრებელი კორპუსის მშენებლობაზე ხელშეკრულება კომპანია „აიდურგეოსთან“ 2018 წელს 6 599 000 ლარზე იყო გაფორმებული. მშენებლობა 2020 წლის 9 ნოემბრამდე უნდა დასრულებულიყო.
  • „აიდურგეოსთან“ სამინისტრომ ხელშეკრულება ვალდებულებების შეუსრულებლობის გამო შეწყვიტა და მშენებლობის დასრულებაზე ახალი ტენდერი გამოაცხადა.
  • ტენდერში გაიმარჯვა „შეზღუდული პასუხისმგებლობის ამხანაგობა მშენებლობის კასპიისპირეთის სამმართველომ“, რომლის დამფუძნებელიც ყაზახური კომპანიაა.
  • ხელშეკრულება ამ კომპანიასთან 2021 წლის 31 მაისს გაფორმდა 2 843 944 ლარზე. ხელშეკრულების მიხედვით, კორპუსების მშენებლობა 210 დღეში ანუ 2021 წლის დეკემბერში უნდა დასრულებულიყო.
  • 2021 წლის 31 დეკემბერს სამინისტროსა და „კასპიისპირეთის სამმართველოს“ შორის გაფორმდა ხელშეკრულება, რითაც სამუშაოების დასრულების ვადა შსს-მ 2022 წლის 28 თებერვლამდე გადაავადა. ამის შემდეგ ცვლილება ხელშეკრულებაში კიდევ ორჯერ შევიდა და კორპუსების მშენებლობის დასრულების ვადა ჯერ 2022 წლის 28 აპრილამდე, შემდეგ კი 28 მაისამდე გადაიწია.
  • „ბათუმელებთან“ „კასპიისპირეთის სამმართველოს“ დირექტორი 2022 წლის მაისში აცხადებდა, რომ მშენებლობა 2022 წლის აგვისტოში დასრულდებოდა [თუმცა სამინისტრომ ივნისში ამ კომპანიასთან ხელშეკრულება შეწყვიტა].

ამავე თემაზე:

რატომ ვერ მიიღეს ბათუმში პოლიციელებმა დაპირებული ბინები 

გადაბეჭდვის წესი


ასევე: