ბათუმის ტერიტორიაზე სამარშრუტო მიკროავტობუსების მოძრაობის სქემა იცვლება. ახალი სქემა ქალაქის მერიამ ბათუმის საკრებულოს უკვე წარუდგინა. საკითხს საკრებულო დღეს, 31 ოქტომბრის სხდომაზე განიხილავს.
სამარშრუტო მიკროავტობუსების ახალი სქემა საკრებულოს შესაბამისი დადგენილების ძალაში შესვლის დღიდან ამოქმედდება.
„ბათუმის მუნიციპალიტეტის ადმინისტრაციულ საზღვრებში M2 კატეგორიის ავტობუსების სამარშრუტო ხაზების სქემებში შევიდა ცვლილებები. აღნიშნული ცვლილებები სრულად აკმაყოფილებს და მორგებულია მგზავრების მოთხოვნებზე.“ – აღნიშნულია პროექტში, რომელიც მერიამ საკრებულოს გადაუგზავნა.
„ახალი სქემით მიკროავტობუსების უმრავლესობის მარშრუტები უცვლელი რჩება და იცვლება ძირითადად, მიკროავტობუსების ყოველდღიური რაოდენობა და ინტერვალი.“ – უთხრეს „ბათუმელებს“ ქალაქის მერიაში.
ამასთან, ახალი სქემით:
- გარკვეულწილად იცვლება N 39, 40 და 44 ნომრით მოძრავი მიკროავტობუსების მარშრუტები [ისინი პუშკინის ქუჩით იმოძრავებენ].
- ქალაქში აღარ იმოძრავებს N47 და N52 სამარშრუტო მიკროავტობუსები.
- ზოგიერთ ხაზზე მიკროავტობუსების ყოველდღიური რაოდენობა მცირდება, ზოგიერთ ხაზზე კი – იზრდება.
ძირითადად იზრდება საშუალო ინტერვალი ერთიდაიგივე ნომრთ მოძრავი მიკროავტობუსებისთვის. მაგალითად, N20, და N21, რომლებიც ყოველ 10 წუთში უნდა მოძრაობდნენ, ახალი სქემით იმოძრავებენ ყოველ ნახევარ საათში; N27 მიკროავტობუსებისთვის ინტერვალი 10-ის ნაცვლად 20 წუთი იქნება, N29-ისთვის 12 წუთი, ნაცვლად 6 წუთისა; N33 მიკროავტობუსებს შორის ინტერვალი 15 წუთის ნაცვლად იქნება 30 წუთი და ა.შ.
- ახალი სქემით მცირდება მიკროავტობუსების რაოდენობა შემდეგ ხაზებზე: NN 20, 21, 27, 29, 30, 33, 36 და 42;
- მიკროავტობუსების ყოველდღიური რაოდენობა იზრდება შემდეგ ხაზებზე: NN 25, 28, 32, 34, 39, 40, 44, 45 და 46.
ბათუმის მერიას ვკითხეთ, რომ მიკროავტობუსები ფაქტობრივად აღნიშნულ ინტერვალებს ძირითადად არ იცავენ და როგორ ხორციელდება კონტროლი?-
„მიკროავტობუსებს შორის ინტერვალი ბათუმის მუნიციპალურმა ინსპექციამ უნდა აკონტროლოს“ – გვითხრეს მერიაში.
ქალაქის მერიას ამ დრომდე არ შეუტანია პროექტი საკრებულოში, მგზავრობის ტარიფების გადახედვაზე. მიკროავტობუსებში კი, თითქმის 10 თვეა რაც მგზავრებს 50 თეთრის ნაცვლად 70 თეთრს უკანონოდ ახდევინებენ.
[yellow_box]ამ თემაზე ვრცლად: [/yellow_box]
„ბათუმელების“ ინფორმაციით, ქალაქის მერია სამარშრუტო მიკროავტობუსებში საბანკო ბარათით გადახდის სისტემის დანერგვასაც გეგმავს.
სამარშრუტო მიკროავტობუსებით მგზავრთა გადაყვანის ნებართვის მოსაპოვებლად კი, ხელახალი კონკურსი მერიამ უახლოეს მომავალში უნდა გამოაცხადოს, ვინაიდან არსებულ ნებართვებს ვადა 2022 წლის პირველ დეკემბრამდე აქვს.
ჩადებს თუ არა მერია კონკურსის მოთხოვნებში სამარშრუტო მიკროავტობუსებში მგზავრობის საფასურის გადახდის ელექტრონულ სისტემაზე გადასვლის ვალდებულებას, ჯერ უცნობია. ასეთი მოთხოვნა წინა კონკურსის პირობაშიც იდო, მაგრამ მაშინ ელექტრონული გადახდის სისტემის დანერგვა მერიამ მგზავრთა გადაყვანის ლიცენზიის მფლობელ კომპანიებს აღარ დაავალა.
რომელიც საკრებულომ უნდა დაამტკიცოს
განახლება: ახალი სქემა ბათუმის საკრებულომ 31 ოქტომბრის დადგენილებით დაამტკიცა, რომელიც ძალაში შევიდა პირველ ნოემბრიდან.
