საქართველოს ჟურნალისტური ეთიკის ქარტია აცხადებს, რომ ევროპის დამოუკიდებელი პრესის საბჭოების ალიანსის (AIPCE) წევრობა შეიჩერა.
წევრობის შეჩერება გამოიწვია ალიანსის გადაწყვეტილებამ არ დაეჭირათ მხარი უკრაინის პრესის საბჭოს მოთხოვნისთვის – გაერიცხათ AIPCE-დან რუსეთის პრესის საბჭო. მას შემდეგ რაც რუსეთი ალიანსში დარჩა, AIPCE დატოვა უკრაინის პრესის საბჭომ.
ევროპის დამოუკიდებელი პრესის საბჭოების ალიანსიდან (AIPCE) რუსეთის პრესის საბჭოს გარიცხვის საკითხი რუსეთ-უკრაინის ომის დაწყებიდან მალევე დააყენა უკრაინის პრესის საბჭომ.
ეს საკითხი იყო ევროპის დამოუკიდებელი პრესის საბჭოების ალიანსის წლიური შეხვედრის განსახილველი მთავარი თემა, რომელიც 20-21 ოქტომბერს კვიპროსში გაიმართა. მასში სხვადასხვა ქვეყნის პრესის საბჭოებთან ერთად საქართველოს ჟურნალისტური ეთიკის ქარტიაც მონაწილეობდა.
„უკრაინის ამ მოთხოვნას მხარს უჭერდა ალიანსის რამდენიმე წევრი, მათ შორის საქართველოს ჟურნალისტური ეთიკის ქარტიაც, რომელიც მიიჩნევდა, რომ რუსეთის უკრაინაში შეჭრის, მედიის თავისუფლების უკიდურესი შეზღუდვის და ფართომასშტაბიანი პროპაგანდის ფონზე რუსეთის პრესის საბჭო ვერ ასრულებდა მასზე დაკისრებულ მოვალეობას და, შესაბამისად, ვერ იქნებოდა დამოუკიდებელ პრესის საბჭოთა ალიანსის წევრი.
უკრაინის ინიციატივაზე გამართული დებატები და კენჭისყრა, ჩვენი შეფასებით, არ იყო დემოკრატიული. კენჭისყრაზე გასულ საკითხს, უნდა დაეტოვებინა თუ არა რუსეთის პრესის საბჭოს ალიანსი, კონფერენციის მონაწილეთა ორმა მესამედმა მხარი არ დაუჭირა და რუსეთი ალიანსის წევრად დარჩა, თუმცა ის დაქვეითდა ასოცირებულ წევრად. პროტესტის ნიშნად, უკრაინის პრესის საბჭომ დატოვა AIPCE,“ – ნათქვამია საქართველოს ჟურნალისტური ეთიკის ქარტიის მიერ გავრცელებულ განცხადებაში.
უკრაინის პრესის საბჭოს პროტესტი სამართლიანად მიიჩნია და მხარი დაუჭირა 9 ქვეყანის საქართველოს, სომხეთის, მოლდოვას, ფინეთის, ნორვეგიის, შვედეთის, ესტონეთის, დანიისა და ირლანდიის ეთიკის საბჭოებმა. ამ ქვეყნებმა ალიანსის წევრობა შეიჩერეს.
„ის ფაქტი, რომ ალიანსის წევრი აღარ არის უკრაინა და არის რუსეთი, შეუძლებელს ხდის ჩვენს დარჩენას AIPCE-ში. დღეს რუსეთში პრესის თავისუფლება პრაქტიკულად არ არსებობს, მთელი მედია სექტორი კი პუტინის საშინელ პროპაგანდისტული მანქანის ნაწილია.
ჩვენ ყველანი მხარს ვუჭერთ AIPCE-ს მიზნებს და დამოუკიდებელი პრესისა და პრესის საბჭოების განვითარებას ევროპაში. ჩვენ გავაგრძელებთ ნებისმიერი ინიციატივის მხარდაჭერას მდგრადი თვითრეგულირების ორგანოების შექმნის მიმართულებით და განვიხილავთ დაბრუნებას ისეთ ალიანსში, სადაც იქნება უკრაინა და შესაძლებლობა გვექნება გავიზიაროთ საუკეთესო პრაქტიკა, იდეები და ღირებულებები,” – ნათქვამია პრესის საბჭოების მიერ მომზადებულ საერთო წერილში, რომელიც გუშინ AIPCE-ს მმართველ კომიტეტს გაეგზავნა. ამ წერილის ქართულ თარგმანს საქართველოს ჟურნალისტური ეთიკის ქარტია ავრცელებს.
„საქართველოს ჟურნალისტური ეთიკის ქარტია კიდევ ერთხელ გამოხატავს თავის მხარდაჭერას უკრაინის პრესის საბჭოსა და უკრაინელი ჟურნალისტების მიმართ და დასძენს, რომ ჩვენთვის მიუღებელია ისეთი ორგანიზაციის წევრობა, რომელიც დღეს ვერ პასუხობს და ვერ იცავს იმ ღირებულებებს, რომელთა გამოც ქარტია მას შეუერთდა,“ – ნათქვამია ქარტიის განცხადებაში.
