ნეტგაზეთი • RU

მერის კაბინეტიდან 15 მეტრში განათების ბოძებია ჩამქრალი… ის კი ხელფასებს ზრდის – რეზო ხარაზი

„ბათუმის დატბორვიდან მეორე დღეს, ბათუმის საკრებულომ და მერიამ, იმის ნაცვლად, რომ ამ ქალაქის ინფრასტრუქტურაზე, ამ ქალაქში [მცხოვრებთა] სოციალურ მდგომარეობაზე ეზრუნათ, გადაწყვიტეს მყისიერად ხელფასების გაზრდა. რაც მორჩათ სანიაღვრე არხების მოვლა პატრონობიდან გადმოიტანეს და თავიანთი ვიცე მერის ხელფასს ზრდიან,“ – ამბობს ბათუმის საკრებულოს წევრი რეზო ხარაზი.

ბათუმის მერმა, არჩილ ჩიქოვანმა საკრებულოს მერიაში დასაქმებული საჯარო მოხელეებისთვის ხელფასების გაზრდის თაობაზე უკვე მიმართა. განკარგულების პროექტზე თანდართული დოკუმენტის მიხედვით, თავად მერის ხელფასი არ იზრდება, ვიცე-მერისა და მისი ორი მოადგილის ხელფასი კი მოიმატებს.

მერიის პარალელურად ხელფასებს ბათუმის საკრებულოშიც გაიზრდიან, მათ შორის იზრდება საკრებულოს თავმჯდომარის ხელფასიც.

ბათუმის მერიისა და საკრებულოს მაღალჩინოსნებისათვის ხელფასების ზრდას ერთიანი ნაციონალური მოძრაობა აპროტესტებს.

პარტიაში თვლიან, რომ მაშინ როდესაც ბათუმი ყოველ გაწვიმებაზე იტბორება, ხალხს წყალი საცხოვრებელ სახლებში შედის, ხოლო ქალაქის ინფრასტრუქტურა მოშლილია, დაუშვებელია საკრებულომ და მერიამ ხელფასები გაზარდოს.

„წლიურად 600 ათასი ლარით იზრდება საკრებულოს წევრების ხელფასები. ჩემთვის გაუგებარია რატომ გადაწყვიტა საკრებულომ ხელფასების გაზრდა მაშინ, როდესაც მოსახლეობას ძალიან უჭირს.

ამ ქალაქში ახალგაზრდებს პერსპექტივას უკლავენ. ვხედავთ როგორ ტოვებენ ახალგაზრდები ქვეყანას. ამ დროს თანამდებობის პირები არ იკლებენ არაფერს თავისი ოჯახებისთვის და ცდილობენ ყოველი შანსი გამოიყენონ ხელფასის მოსამატებლად,“- განაცხადა დღეს გამართულ ბრიფინგზე ბათუმის საკრებულოს წევრმა ენმ-იდან ალექსანდრე ვარშალომიძემ.

ალექსანდრე ვარშალომიძე

„ბაღის მასწავლებლებს და მსგავს დაწესებულებებში დასაქმებულებს უნდა გაეზარდოს ხელფასი და ვემხრობით ამას. მაგრამ იმ ადამიანებს, ვინც თანამდებობებზე ზიან, მათ არ უნდა გაეზარდოთ. ამ ადამიანებს უნდა ვაიძულოთ, რომ ორშაბათს ეს გადაწყვეტილება არ მიიღონ.

მოვუწოდებ საკრებულოს ამოიღონ დღის წესრიგიდან ეს საკითხი. დღეს არ არის დრო ინფრასტრუქტურას მოვაკლოთ ფული, გაჭირვებულ ხალხს და თქვენი კეთილდღეობისთვის გავზარდოთ ხელფასები. ეს არის დანაშაული და ამ დანაშაულისთვის პოლიტიკურ სასჯელს იმსახურებს „ქართული ოცნება“.

კიდევ ერთხელ ვუსვამ ხაზს, მაშინ როცა როცა ქალაქი დაიტბორა, ყველა ფეხის ნაბიჯზე ინფრასტრუქტურა მორყეულია, არ არის დრო ქალაქის მერმა და საკრებულოს თავმჯდომარემ ხელფასები გაზარდონ. კაბინეტის მიღმა რა ხდება ამ ადამიანებს არ აინტერესებთ. მერის კაბინეტიდან 15 მეტრში განათების ბოძებია ჩამქრალი,“ – ამბობს რეზო ხარაზი.

მერიისა და საკრებულოს მაღალჩინოსნების ხელფასების გაზრდაზე ბათუმის საკრებულომ ორშაბათს, 31 ოქტომბერს დაგეგმილ საკრებულოს სხდომაზე უნდა იმსჯელოს.

ამავე თემაზე:

ბათუმის მერმა ხელფასების გაზრდის თხოვნით საკრებულოს მიმართა

 

ნეტგაზეთის მასალების სხვა გამოცემებში გადაბეჭდვის წესი
ავტორი