ბათუმის მერმა, არჩილ ჩიქოვანმა საკრებულოს მერიაში დასაქმებული საჯარო მოხელეებისთვის ხელფასების გაზრდის თაობაზე მიმართა. განკარგულების პროექტზე თანდართული დოკუმენტის მიხედვით, თავად მერის ხელფასი არ იზრდება, რასაც ვერ ვიტყვით ვიცე-მერსა და კიდევ ორ მოადგილეზე.
მერის ხელფასი გასულ წელს 5500 ლარამდე გაიზარდა.
თანამდებობრივი სარგოების განაწილების დადგენილებაში ცვლილების შემდეგ, ბათუმის ვიცე-მერის ხელფასი 300 ლარით იზრდება და 4700 ლარი იქნება. მერის კიდევ ორი მოადგილის ხელფასი კი 4150 ლარი იქნება.
პროექტის მიხედვით, მერიის ადმინისტრაციის უფროსის ხელფასი 3520 ლარი იქნება [ამ დროისთვის იყო 3190].
მერიის სამსახურის უფროსების ხელფასი 3520 ლარით განისაზღვრება, განყოფილების უფროსების ხელფასი 2750 ლარი იქნება. სამართლებრივი უზრუნველყოფის განყოფილების უფროსის ხელფასი კი 3080 ლარი იქნება.
მეორე კატეგორიის უფროსი სპეციალისტი მერიაში 1760 ლარს, მეამე კატეგორიის უფროსი სპეციალისტი კი 1650 ლარს მიიღებს.
მერის განმარტებით: „საჯარო მოხელეების თანამდებობრივი სარგო საჯარო დაწესებულებაში შრომის ანაზღაურების შესახებ კანონით განსაზღვრული თანამდებობისთვის დადგენილი მე-9 სახელფასო კატეგორიის კოეფიციენტის შესაბამისად გაიზრდება.“
ცვლილების შემდეგ მერიის ერთი თვის სახელფასო ფონდი 48 915 ლარით გაიზრდება, რაც ერთ წელში ნახევარ მილიონზე მეტია [586 980 ლარი].
საჯარო სამსახურებში 2022 წლიდან ხელფასების გაზრდას საჯარო მოხელეებს პრემიერი ღარიბაშვილი დაჰპირდა.
2022 წლის 30 სექტემბერს კი, პრემიერმა ირაკლი ღარიბაშვილმა საჯარო მოხელეებისთვის ხელფასების გაზრდის აუცილებლობაზე ისევ ისაუბრა. პრემიერის ინფორმაციით, 2023 წლიდან თავდაცვის სამინისტროს, შინაგან საქმეთა სამინისტროსა და უსაფრთხოების სამსახურის დაფინანსება, ჯამში, 490 მილიონი ლარით გაიზრდება. შედეგად, 20 პროცენტით გაიზრდება ამ უწყებებში დასაქმებულთა ხელფასები.
