ბათუმის მერიაში დღეს, 25 ოქტომბერს, სამუშაო დღის განმავლობაში ვერ გვიპასუხეს კითხვაზე – რატომ არ ან ვერ აგვარებს მერია პრობლემას, როცა მდინარე ყოროლისწყალი ქალაქის ნაწილს ყოველ ძლიერ გაწვიმებაზე ტბორავს?
ეს პრობლემა კიდევ ერთხელ თვალსაჩინო გუშინ, 24 ოქტომბერს გახდა, როცა თამარის დასახლებისა და მახინჯაურის მონაკვეთში დაახლოებით 4-საათიანი საცობი შეიქმნა.
ეს არ არის ქალაქის შემოსასვლელი ცენტრალური გზის საათობით პარალიზების პირველი შემთხვევა, თუმცა ბათუმის მერია პრობლემას არ იმჩნევს. ბათუმის მერიის პრესცენტრში გვითხრეს, რომ კითხვებზე მერიის შპს „ბათუმის წყალში“ გვიპასუხებდნენ.
„მდინარე ყოროლისწყლის ადიდებამ გამოიწვია დიდი რაოდენობით ნატანი მასალის სანიაღვრე მილებში მოხვედრა და წყლის ნაკადის გადმოსვლა მახინჯაურის ტერიტორიაზე, საავტომობილო გზაზე“ – მოგვწერეს „ბათუმის წყლიდან“.
აქვე გვითხრეს, რომ ქალაქის მასშტაბით, მათ შორის, აღნიშნულ ტერიტორიაზეც, „სანიაღვრე არხებისა და ჭების გაწმენდა რეგულარულად ხორციელდება“.
რა გაკეთდა ამ დრომდე იმისთვის, რომ ეს პრობლემა მოგვარებულიყო? – „ბათუმის წყლის“ პრესცენტრში გვითხრეს, რომ შესაბამისი ინფრასტრუქტურის მოწყობა მათი საქმე არ არის და კითხვას ვერ უპასუხებენ. აქ ვერ განმარტეს, რის გაკეთების საჭიროებას ხედავენ ის სპეციალისტები, რომლებიც სანიაღვრე სისტემას პერიოდულად ასუფთავებენ.
რა არის საჭირო ტექნიკურად, რომ იგივე პრობლემა არ განმეორდეს, ისევ არ დაიტბოროს ქალაქის ეს ნაწილი და მრავალსაათიანი საცობები არ მივიღოთ? ან გაკეთდა თუ არა ამ მიმართულებით რამე? – ბათუმის კეთილმოწყობის და ინფრასტრუქტურის სამმართველოში „ბათუმელების“ კითხვა უპასუხოდ დატოვეს.
ბათუმის მერიის პრესცენტრში ვერ გვითხრეს, უნდა ველოდოთ თუ არა ზოგადად რაიმე სახის სამუშაოებს ამ მიმართულებით, რაც მორიგი დატბორვის რისკს შეამცირებს.
„აჭარაში უხვი ნალექი ახალი ამბავი არაა. პრევენციული ზომებია მისაღები დროულად და ეგაა“, – ეს ერთ-ერთი მოქალაქის კომენტარია „ბათუმის წყლის“ ოფიციალურ ფეისბუქგვერდზე, როცა ამ უწყებამ სანიაღვრე სისტემის გაწმენდის სამუშაოების ამსახველი ფოტოები გამოაქვეყნა.
მოქალაქეები ბათუმის მერიის საყვედურობენ იმის გამო, რომ წლებია ეს პრობლემა არსებობს და არ გვარდება.
„უკვე მერამდენე წელია ასეა და ნუთუ მოგვარება ასე რთულია. 7 საათიდან 12 საათამდე ასე იყო. 5-საათიანი საცობი იყო. პარალიზებული იყო ცენტრალური გზა. საცობში მოვყევი პირადად. ბავშვები ცეკვიდან სახლში ვერ მივიყვანე შუაღამემდე და ასე იყო უამრავი ხალხი ჩემთან ერთად. სადმე თუ უნდა გატარდეს სამუშაო ქალაქში, პირველ რიგში, ამ ტერიტორიაზე,“ – წერს კიდევ ერთი მოქალაქე ისევ „ბათუმის წყლის“ ოფიციალურ ფეისბუქგვერდზე.
___________
ფოტოზე: დატბორილი ცენტრალური გზა. ფოტო: ბათუმის წყალი
