ნეტგაზეთი • RU

სპეციალური საგამოძიებოს განცხადება ენმ-ის წევრების დაბარებასა და ტელეფონების ჩამორთმევაზე

სპეციალური საგამოძიებო სამსახურის ინფორმაციით, ხელვაჩაურის საკრებულოს წევრის, ენმ-ის ფრაქციის უკვე ყოფილი თავმჯდომარის, მალხაზ თავდგირიძის მიმართვის საფუძველზე გამოძიება დაიწყო.

მალხაზ თავდგირიძემ საგამოძიებო სამსახურს დღეს, 17 ოქტომბერს მიმართა. სამსახურმა დღესვე დაიწყო გამოძიება და უკვე გამოჰკითხეს ხელვაჩაურის საკრებულოს ერთი წევრი – მამუკა ჯევაიში და აჭარის უმაღლესი საბჭოს წევრი ელგუჯა ბაგრატიონი. ამოღებულია მათი ტელეფონები.

საგამოძიებო სამსახურის მიერ გავრცელებულ განცხადებას უცვლელად გთავაზობთ:

„ფრაქციის თავმჯდომარის მ.თ-ს [მალხაზ თავდგირიძე] განცხადების საფუძველზე სამსახურებრივი მდგომარეობით, მისი პირადი მიმოწერის უკანონოდ მოპოვების, გამოყენებისა და გავრცელების ფაქტზე გამოძიება დაიწყო, საქართველოს სისხლის სამართლის კოდექსის 159-ე მუხლის 1-ლი, მე-2 და მე-4 ნაწილის „ბ“ ქვეპუნქტით გათვალისწინებული დანაშაულის ნიშნებით.

საქმეზე მოწმის სახით გამოკითხულმა მ. თ-მ [მალხაზ თავდგირიძე] განმარტა, რომ 2021 წლიდან არის ხელვაჩაურის საკრებულოს წევრი და „ერთიანი ნაციონალური მოძრაობის“ ფრაქციის თავმჯდომარე. 2022 წლის 29 აგვისტოს, ე.ბ.-მ [ელგუჯა ბაგრატიონი] კუთვნილ მობილურ ტელეფონში აჩვენა მასა და მის თანაფრაქციელ თ. თ.-ს შორის განხორციელებული მიმოწერის ე.წ. „სქრინები“. მოწმის განმარტებით, ე.ბ.-მ [ელგუჯა ბაგრატიონი] უთხრა, რომ აღნიშნული შეტყობინებები მოიპოვა და მას გადასცა მათივე თანაპარტიელმა მ.ჯ.-მ. [მამუკა ჯევაიში].

სპეციალურმა საგამოძიებო სამსახურმა მოსამართლის განჩინების საფუძველზე, მიმოწერის უკანონოდ მოპოვების და გამოყენების დამადასტურებელი მტკიცებულების მოძიების მიზნით ე.ბ-ს [ელგუჯა ბაგრატიონი] და მ.ჯ-ს [მამუკა ჯევაიში] კუთვნილი მობილური ტელეფონები ამოიღო, რომელიც დაილუქა მესაკუთრეების თანდასწრებით, რის შემდეგაც აღნიშნული ნივთმტკიცებები გადაიგზავნება ექსპერტიზის ბიუროში მობილურ ტელეფონებში მ.თ.-ს [მალხაზ თავდგირიძე] პირადი მიმოწერის ამსახველი უკანონოდ მოპოვებული და გავრცელებული „სქრინების“ არსებობის დასადგენად“.

____

ამავე თემაზე:

საგამოძიებომ ენმ-ს წევრებს ტელეფონები ჩამოართვა, მათ ყოფილმა თანაპარტიელმა უჩივლა

ნეტგაზეთის მასალების სხვა გამოცემებში გადაბეჭდვის წესი
ავტორი