ნეტგაზეთი • RU

კლინიკების დაფინანსების ახალი მოდელი ნოემბრიდან ამოქმედდება

სამედიცინო დაწესებულებებში სახელმწიფოს მიერ კლინიკების დაფინანსების ახალი, DRG მოდელი პირველი ნოემბრიდან ამოქმედდება.

საქართველოს ჯანდაცვის სამინისტროს განმარტებით, DRG სისტემის დანერგვის შემდეგ, სამედიცინო მომსახურების მიღებისას, პაციენტს დამატებითი ხარჯის გაწევა აღარ მოუწევს და მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში, თანაგადახდის წილი ითვალისწინებს.

„DRG პრინციპი გულისხმობს, რომ პაციენტს უნაზღაურდება დაფინანსება დიაგნოზის მიხედვით. შესაბამისად, კონკრეტულ დიაგნოზზე არის განსაზღვრული კონკრეტული ტარიფი და არ აქვს მნიშვნელობა, რა ჩარევა სჭირდება [პაციენტს] – ოპერაცია, რეანიმაცია, თუ ასე შემდეგ, ყველა ეს ჩარევა უნდა გაკეთდეს და სახელმწიფო უხდის [კლინიკას] დიაგნოზის მიხედვით. იცვლება მხოლოდ გადახდის პრინციპი, გადახდის პრინციპი არის ურთიერთობა კლინიკებსა და სახელმწიფოს შორის.

თუ დღემდე კლინიკას შეეძლო, რომ მოეთხოვა პაციენტისთვის საყოველთაოს პრინციპით დაშვებული თანაგადახდის გარდა დამატებით VIP ოთახის, უმეტესი სერვისისა თუ ექიმის ჰონორარის დაფინანსება, მას შემდეგ, რაც DRG პრინციპი გაეშვება, ამის მოთხოვნის უფლება კლინიკას არ ექნება“, – განმარტავს ილია ღუდუშაური, ჯანდაცვის მინისტრის მოადგილე.

DRG დაფინანსების მოდელია, რომლითაც ავტომატურად გამოითვლება ის სამართლიანი ფასი, რასაც სამინისტრო მოქალაქეების ხარისხიანი მკურნალობისთვის გადაიხდის – განმარტავს ჯანდაცვის სამინისტრო.

ჯანდაცვის სამინისტროს პოლიტიკის დეპარტამენტის ხელმძღვანელის, ეკა ადამიას განმარტებით, ამ მეთოდით დაფინანსების მექანიზმი გამორიცხავს ერთსა და იმავე ჩარევაზე სხვადასხვა კლინიკაში განსხვავებულ ფასს:

„ეს მექანიზმი უზრუნველყოფს იმას, რომ ერთსა და იმავე სერვისზე, ქვეყნის მასშტაბით, ყველა კლინიკაში იქნება ერთი და იგივე ფასი და პაციენტებიც შესაბამისად, თანაგადახდას გადაიხდიან თანაბარი პრინციპით“.

საქართველოს ჯანდაცვის სამინისტროს ცნობით, ამ ეტაპზე DRG სისტემა არ გავრცელდება შემდეგ სამედიცინო მომსახურებაზე:

  • გეგმური და გადაუდებელი ამბულატორია
  • ნეონატალური ასაკის (ნეონატალურ ასაკში დაწყებული) ინტენსიური მოვლა/მკურნალობა
  • გულის თანდაყოლილი მანკების მკურნალობა
  • მშობიარობა / საკეისრო კვეთა
  • ქიმიოთერაპია, ჰორმონოთერაპია და სხივური თერაპია და მასთან დაკავშირებული გამოკვლევები და მედიკამენტები
  • კომბუსტიოლოგია [მოზრდილთა სტაციონარული დახმარება]
  • თრომბოლიზისი და თრომბექტომია, ინსულტის შემთხვევაში
  • სხვა მაღალტექნოლოგიური სამედიცო მომსახურება
ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან