ნეტგაზეთი • RU

რუსეთში მობილიზებული სამხედროები სასწავლო ცენტრიდან უკან გააბრუნეს – უკრაინის გენშტაბი

უკრაინის გენშტაბი ავრცელებს ინფორმაციას, რომ რუსეთში მობილიზებული სამხედროები ერთ-ერთი სასწავლო ცენტრიდან უკან გააბრუნეს, რადგან მათი აღჭურვილობითა და საკვებით უზრუნველყოფა ვერ მოახერხეს.

„მოწინააღმდეგეს აქვს პრობლემები უზრუნველყოფასთან დაკავშირებით „ნაწილობრივი მობილიზაციის“ ფარგლებში. კრასნოდარის მხრიდან, მოლკინოს სასწავლო ცენტრიდან, მობილიზებული პირადი შემადგენლობა უკან გააბრუნეს პრიმორსკო-ახტარსკში იმის გამო, რომ ვერ შეძლეს მათი განთავსება, საკვებითა და ტანსაცმლით უზრუნველყოფა,“ – აღნიშნავს უკრაინის გენშტაბი.

მობილიზაციის გამო შექმნილ ადმინისტრაციულ და ლოგისტიკურ პრობლემებზე წერდნენ საერთაშორისო ინსტიტუტები და უწყებებიც. დიდი ბრიტანეთის დაზვერვის ცნობით, რუსეთს სულ უფრო და უფრო უჭირს მობილიზებულებისა და ახალწვეულების აღჭურვა და წვრთნა, არ ჰყოფნის ინსტრუქტორები და ასევე ოფიცრები, რომლებსაც მობილიზებულთა დანაყოფებს ჩააბარებს.

„ნაწილობრივი მობილიზაცია“ რუსეთში პრეზიდენტმა პუტინმა 21 სექტემბერს გამოაცხადა. ოფიციალურად, ბრძანება ეხება რეზერვში მყოფ და სამხედრო გამოცდილების პირებს. თავდაცვის მინისტრის, სერგეი შოიგუს თქმით, რუსეთში 300 000 ადამიანის მობილიზება იგეგმება.

რუსული პროკრემლისტური მედია შოიგუზე დაყრდნობით ავრცელებს ინფორმაციას, რომ 200 ათასი პირი უკვე მობილიზებულია.

რუსულ ტელეგრამარხებზე ვრცელდება არაერთი ვიდეომასალა, სადაც მობილიზებულები აცხადებენ, რომ მათ კარვებიც კი არ მისცეს და ყინვაში, მინდორში უწევთ ღამის გათევა.

უკრაინული მედიის ინფორმაციით კი, რომლებიც თავდაცვის სამინისტროზე დაყრდნობით ავრცელებენ ინფორმაციას, მინიმუმ 2 000-მა მობილიზებულმა უკვე დარეკა უკრაინულ მხარესთან და გაიარა კონსულტაციები, როგორ ჩაბარდეს ტყვედ. მობილიზებულები რეკავენ როგორც რუსეთის, ისე ბელორუსის ტერიტორიიდან.

Forbes-ის ცნობით, მობილიზაციის გამოცხადებიდან ორ კვირაში რუსეთი 700 ათასმა ადამიანმა დატოვა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.