დიდი ბრიტანეთის დაზვერვა ადასტურებს, რომ უკრაინა წარმატებით განაგრძობს კონტრშეტევას ორივე ფრონტზე – ჩრდილო-აღმოსავლეთში და სამხრეთში. უწყების ცნობით, ხარკოვის ოლქში, მდინარე ოსკილის აღმოსავლეთით, უკრაინას ამჟამად მნიშვნელოვანი ტერიტორია უჭირავს.
„უკრაინის ძალებმა მდინარიდან 20 კილომეტრით წაიწიეს წინ ქალაქ სვატოვოსკენ, რომელიც რუსეთის თავდაცვის ზონა და მისი ლოგისტიკის ერთ-ერთი კვანძია,“ – წერს დაზვერვა 5 ოქტომბრის რელიზში.
უწყების ვარაუდით, სრულიად მოსალოდნელია, უკრაინამ ახლა არტილერიით დაარტყას სვატოვო-კრემენაიას გზას, რაც კიდევ უფრო შეზღუდავს რუსეთის შესაძლებლობებს შეავსოს თავისი მარაგები აღმოსავლეთში.
„პოლიტიკური თვალსაზრისით, რუსეთის ხელმძღვანელობა შეშფოთებული უნდა იყოს ლუგანსკის ოლქის საზღვრებთან მოწინავე უკრაინული დანაყოფების მიახლოებით, ოლქისა, რომელიც როგორც რუსეთი აცხადებს, გასული პარასკევის შემდეგ, რუსეთის ნაწილია,“ – აღნიშნავს დაზვერვა.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება რუსეთში მობილიზაციისა და საშემოდგომო გაწვევის პრობლემებზე წერდა.
მთავარ ფოტოზე: უკრაინის საბრძოლო მოქმედებების რუკა 4 ოქტომბრის მდგომარეობით/დიდი ბრიტანეთის დაზვერვა
