Batumelebi | მწყობრიდან გამოსული ველოსიპედები და „ბათუმველოს“ პრობლემები [ვიდეო] მწყობრიდან გამოსული ველოსიპედები და „ბათუმველოს“ პრობლემები [ვიდეო] – Batumelebi
RU | GE  

მწყობრიდან გამოსული ველოსიპედები და „ბათუმველოს“ პრობლემები [ვიდეო]

„ბათუმველოს” მომხმარებელთა უკმაყოფილებას ხშირად იწვევს გათიშული ტერმინალები, ტერმინალებზე მწყობრიდან გამოსული ველოსიპედები თუ დაზიანებული ინფრასტრუქტურა. გათიშულ ტერმინალთან მისულ მომხმარებელს ცხელი ხაზის ნომრის პოვნაც უჭირს, რადგან ის არც ტერმინალზეა დატანილი და არც ველობარათზე. ამ და სხვა პრობლემების მოგვარებისთვის შპს “ბათუმის ავტოტრანსპორტი” 25 000-ზე მეტი ლარის დახარჯვას აპირებს. ამ თანხით არსებული 23 ველოტერმინალი და 370 ველოსიპედი უნდა შეაკეთონ.

როგორც შპს “ბათუმის ავტოტრანსპორტის” დირექტორი პაატა დუმბაძე ამბობს, „ბათუმველო” საკუთარი შემოსავლებით ახერხებს ხარჯების გასწორებას და მცირე მოგებასაც კი იღებს. მისი თქმით, ამ ხნის განმავლობაში ანახლებდნენ დაზიანებულ ტექნიკას, რაც წელიწადში დაახლოებით 10-12 ათასი ლარი ჯდებოდა, მაგრამ წელს გადაწყდა განახლების სამუშაოებს მასშტაბური სახე მისცემოდა:

„5 წელია უკვე „ბათუმველო” არსებობს და, შესაბამისად, ცვეთა ყოველწლიურად ემატება. სამწუხაროდ, ჩვენი მომხმარებელი არ ეპყრობა ტექნიკას ისე, როგორც საჭიროა, არ იცავენ მოხმარების წესებს, არღვევენ ინსტრუქციებს. აქედან გამომდინარე ბევრი ველოსიპედი და ველოტერმინალი გამოვიდა მწყობრიდან”, – ამბობს პაატა დუმბაძე და დასძენს, რომ ველოტერმინალებზე არის ისეთი პრობლემებიც, რაც მათგან დამოუკიდებელი მიზეზებით არისგანპირობებული და ელექტროენერგიის შეფერხებით მიწოდებას უკავშირდება. მისი თქმით, მომხმარებელმა, ვინც მსგავს ტერმინალთან აღმოჩნდება, უნდა გადაიყვანოს ველოსიპედი სხვა, ახლო მდებარე, ჩართულ ტერმინალთან ან დარეკოს ცხელ ხაზზე, რის შემდეგაც ფიქსირებულ მომენტში შეჩერდება დროის ათვლა და, შესაბამისად, მომხმარებელს სხვა ტერმინალთან გადაყვანისთვის დახარჯული დროის საფასური არ ჩამოეჭრება.

ეს ჯერჯერობით არის რეკომენდაცია რეკომენდაციისთვის, რადგან ცხელი ხაზის ნომერი არც ბარათებზეა დატანილი და არც ტერმინალზე, შესაბამისად, მომხმარებლისთვის ნომრის არსებობა უცნობია. ამას პაატა დუმბაძე იმით ხსნის, რომ ტერმინალების დამონტაჟებისას ცხელი ხაზის სერვისი არ არსებობდა. მისი თქმით, განახლების შემდგომ ამ მონაცემს აუცილებლად დაიტანენ ბარათებზე.

ცხელი ხაზის ნომერია: 24 76 76 ან 593 77 05 05.

როგორც შპს “ბათუმის ავტოტრანსპორტის” დირექტორი ამბობს, მომხმარებელთა უკმაყოფილება ხშირ შემთხვევაში ობიექტურია და ახლა სწორედ ამის გამომწვევი მიზეზების აღმოფხვრას ცდილობენ. მისი თქმით, მიმდინარე სამუშაოების პარალელურად ახალი პრობლემები ჩნდება, რაც პროცესს დროში წელავს, თუმცა სამუშაოების დაახლოებით 20% შესრულებულია. პაატა დუმბაძე იმედოვნებს, რომ ზაფხულის სეზონის დაწყებასთან ერთად ძირითადი სამუშაოები დასრულდება.

ტურისტული სეზონის დასაწყისისთვის იგეგმება „ბათუმველოს” ახალი სერვისის ამოქმედება, რაც გულისხმობს ველობარათების ბალანსის შევსებას გადახდის ტერმინალების მეშვეობით. „ეს სერვისი მომხმარებელს მისცემს დროის ეფექტურად გამოყენების შესაძლებლობას. ამ დრომდე მომხმარებელი ბარათზე ანგარიშს ავსებს ჩვენთან, ოფისში. ზაფხულობით განსაკუთრებით დიდი რიგებია ბარათზე ანგარიშის ჩასარიცხად თუ ბარათის ასაღებად. ახალი სერვისის შემოღების შემდეგ მომხმარებელი, ვისაც ექნება ჩვენი ბარათები, თანხას ტერმინალებიდანაც ჩარიცხავს. ეს ბევრ უხერხულობას მოხსნის”, – ამბობს პაატა დუმბაძე. ის ასევე დასძენს, რომ არ გამორიცხავს, ზაფხულის სეზონის შემდეგ, როდესაც ველოტერმინალების განახლებას მორჩებიან, შპს „ბათუმის ავტოტრანსპორტმა” ქალაქში ახალი ტერმინალებიც დაამატოს.

შპს „ბათუმის ავტოტრანსპორტის” დირექტორის ინფორმაციით, „ბათუმველოს” არსებობის ისტორიაში საჯარიმო შემთხვევების ორი, ველოსიპედის 24 საათის განმავლობაში დაუბრუნებლობის – სამი [დღესაც მიმდინარეობს გამოძიება ამ ფაქტზე] და ტერმინალიდან ველოსიპედის დაკარგვის ან დაზიანების დაახლოებით ათი ფაქტი დაფიქსირდა.
„ბათუმველო” შპს ბათუმის ავტოტრანსპორტის პროექტია და 2011 წლიდან არსებობს.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან