გერმანიის კანცლერი ოლაფ შოლცი პუტინთან სატელეფონო საუბრის შემდეგ აცხადებს, რომ მის პოზიციაში ვერანაირი ცვლილება ვერ შენიშნა, რუსეთის პრეზიდენტი უკრაინაში შეჭრას კვლავაც სწორ ნაბიჯად მიიჩნევს და ომის დასრულებას არ პირებს.
Die Welt-ის ცნობით, შოლცმა პუტინთან საუბარზე კომენტარი პრესკონფერენციაზე გააკეთა.
„სამწუხაროდ, ვერ გეტყვით, რომ იქ გააცნობიერეს, რამხელა შეცდომა იყო ამ ომის დაწყება. ასევე, არ ჩანდა არანაირი ნიშანი იმისა, რომ იქ ახალი ხედვები გაჩნდა,“ – აღნიშნა შოლცმა.
ამის მიუხედავად, გერმანიის კანცლერი დარწმუნებულია, რომ პუტინთან ლაპარაკის გაგრძელება აუცილებელია.
„მჯერა, რომ რუსეთმა უნდა დაიხიოს უკან, უნდა გაიყვანოს თავისი ჯარები, რათა რეგიონში მშვიდობას ჰქონდეს შანსი. ყოველდღიურად ვრწმუნდები, რომ ეს ერთადერთი პერსპექტივაა,“ – დასძინა შოლცმა.
სატელეფონო საუბარი გერმანიის კანცლერსა და რუსეთის პრეზიდენტს შორის 13 სექტემბერს, დღის მეორე ნახევარში შედგა. გერმანიის ფედერალური მთავრობის წარმომადგენლის ინფორმაციით, შოლცმა ხაზი გაუსვა ფრონტზე არსებული სიტუაციის სირთულეს, რუსეთის სამხედრო აგრესიის შედეგებს და კრემლს მოუწოდა, რაც შეიძლება სწრაფად იპოვოს უკრაინის წინააღმდეგ დაწყებული ომის დასრულების დიპლომატიური გზები.
გერმანიის მთავრობის ხელმძღვანელი რუსეთის პრეზიდენტს ელაპარაკა ცეცხლის შეწყვეტის, უკრაინის ტერიტორიიდან რუსეთის ჯარების გაყვანისა და უკრაინის ტერიტორიული მთლიანობისა და სუვერენიტეტის დაცვის აუცილებლობაზე. მან აღნიშნა, რომ რუსეთის ნებისმიერი სამომავლო მცდელობა მოახდინოს სხვა ქვეყნების ტერიტორიების ანექსია „არ დარჩება უპასუხოდ და საერთაშორისო საზოგადოება მას არავითარ შემთხვევაში არ აღიარებს“.
