მთავარი,სიახლეები

„ოცნება“ საკრებულოს სხდომაზე არ მივიდა, სადაც „ბიაფის“ დაფინანსებაზე უნდა ემსჯელათ

14.09.2022 • 746
„ოცნება“ საკრებულოს სხდომაზე არ მივიდა, სადაც „ბიაფის“ დაფინანსებაზე უნდა ემსჯელათ

ბათუმის საკრებულოს სხდომას „ოცნების“ უმრავლესობა არ დაესწრო. რიგგარეშე სხდომა საკრებულოს აპარატმა „ერთიანი ნაციონალური მოძრაობის“ ფრაქციის მოთხოვნით დანიშნა, ისე რომ სხდომის შესახებ ინფორმაცია საკრებულოს ვებგვერდზე გამოქვეყნებული არ ყოფილა და მხოლოდ დღეს დილით გამოაქვეყნეს.

 

სხდომაზე არც საკრებულოს თავმჯდომარე რამაზ ჯინჭარაძე და მისი მოადგილე ირაკლი თავდგირიძე მივიდნენ.

სხდომის შესახებ დღეს დილით გავიგე, გვითხრა საკრებულოს წევრმა „გახარია საქართველოდან“ აკაკი გვიანიძემ. მას დილის 10:00 საათზე დაურეკეს.

სხდომაზე „ერთიანი ნაციონალური მოძრაობიდან“ ცხრა წევრი ესწრებოდა, სხდომაზე დასასწრებად მივიდა ასევე „ლელოს“ წარმომადგენელი ვაჟა დარჩია.

რამდენიმე წუთიანი ლოდინის შემდეგ ენმ-ის ფრაქციის თავმჯდომარემ, ლაშა კილაბერიამ გააკეთა განაცხადა, რომ სხდომა არ შედგებოდა: „ოცნება“ უარს ეუბნება „ბიაფს“ იმის გამო, რომ ვერ გამოიყენა, მისგან  პოლიტიკური სარგებელი ვერ მიიღო“.

ვაჟა დარჩიამ მოუწოდა საზოგადოებას შეიძინონ „ბიაფის“ საიმიჯო ნივთები და ასე დაეხმარონ ორგანიზატორებს, რომ ფესტივალი ჩატარდეს ხარვეზების გარეშე.

„ბათუმელებმა“ სცადა გაერკვია „ოცნების“ წევრების შეხედულებები – რას ფიქრობენ „ბიაფზე“ ან მის დაფინანსებაზე/არდაფინანსებაზე. ბათუმის საკრებულოში უმრავლესობის უმრავლესობა სატელეფონო ზარებს არ პასუხობს.

საავტორო კინოს ბათუმის საერთაშორისო ფესტივალი BIAFF-ი ბათუმში უკვე 17 წელია იმართება, თუმცა წელს პირველად, არ აფინანსებს არც ერთი სახელმწიფო სტრუქტურა. ფესტივალის მხარდამჭერი ამ დროისთვის მხოლოდ რამდენიმე ქვეყნის საელჩო და ორგანიზაციაა, სწორედ ამიტომ მიმართავს BIAFF-ი საზოგადოებას ფინანსური მხარდაჭერის თხოვნით.

____

ერთად ჩავატაროთ „ბიაფი“ – დაიწყო კამპანია ბათუმის კინოფესტივალის მხარდასაჭერად

გადაბეჭდვის წესი


ასევე: