კიევი აღარ არის მზად რუსეთთან მოლაპარაკებისთვის იმ პირობით, რომ ოკუპანტი ქვეყნის ჯარები 24 თებერვლის პოზიციებზე დაბრუნდნენ. ახლა ამას უკრაინის სრული დეოკუპაცია სჭირდება. კიევი მზადაა რუსეთს მოელაპარაკოს მხოლოდ 1991 წლის საზღვრებში, სრული დეოკუპაციის შემდეგ – ამის შესახებ დღეს უკრაინის თავდაცვის მინისტრმა, ოლექსი რეზნიკოვმა ისაუბრა.
რეზნიკოვმა დღეს იალტის ევროპული სტრატეგიის ორდღიანი კონფერენცია დახურა.
თავდაცვის მინისტრის თქმით, ახლა უკრაინას არწმუნებენ შეუთანხმდეს რუსეთს. თუმცა, კონკრეტულად ვისზეა საუბარი, რეზნიკოვმა არ დაასახელა.
„ჩვენ ბევრი რამ ვისწავლეთ (ომში), მათ შორის ვისწავლეთ არ ვენდოთ არანაირ საუბარს მშვიდობაზე, რომელსაც ჩვენი პარტნიორები გვთავაზობენ“, – განაცხადა უკრაინის თავდაცვის სამინისტროს ხელმძღვანელმა.
ამასთან, რეზნიკოვმა გაახმოვანა უკრაინის ახალი პოზიცია რუსეთთან მოლაპარაკებების დაწყების წინაპირობებთან დაკავშირებით – კიევი აღარ დასთანხმდება იმას, რასაც აქამდე სთავაზობდა რუსეთს.
„საიდუმლოს გავამხელ. ჩვენ რუსებს ვუთხარით: იმისათვის, რომ მოლაპარაკებები გავაგრძელოთ და შეთანხმებას მივაღწიოთ, ჯარი უნდა დააბრუნოთ 23 თებერვლის მდგომარეობაში. მაშინ ეს შესაძლებელი იყო. ახლა ისინი გასცდნენ ამ ზღვარს, ამიტომაც ეს ვარიანტი უკვე დიდი ხანია შეუძლებელია“, – განაცხადა მინისტრმა.
რეზნიკოვის თქმით, კიევი მოლაპარაკებების წინაპირობად ახლა დონბასის და ყირიმის სრულ დეოკუპაციას ასახელებს.
„24 თებერვლის ვარიანტები უკვე აღარ არსებობს. 1991 წლის პირველი დეკემბრის მდგომარეობით. გადით“ – შეაჯამა რეზნიკოვმა.
უკრაინასთან მოლაპარაკებების შესახებ დღეს ისაუბრა რუსეთის საგარეო საქმეთა მინისტრმაც. სერგეი ლავროვის თქმით, რაც უფრო მეტად გაიწელება ეს პროცესი, მშვიდობის მიღწევა მით უფრო რთული იქნება.
