ნეტგაზეთი • RU
sportis sasaxle

აჭარაში შენდება და რემონტდება რამდენიმე სპორტული ობიექტი

აჭარის პროექტების მართვის კომპანია სისტემატურ კონტროლს უწევს რეგიონის მასშტაბით მიმდინარე სპორტული ობიექტების მშენებლობისა და რეაბილიტაციის პროცესს. პარალელურ რეჟიმში მიმდინარე რამდენიმე ობიექტი კომპანიის დირექტორმა ბაქარ ჩიტაიამ, მუნიციპალური პროექტების მართვის კოორდინატორთან, გიორგი ქათამაძესთან ერთად მოინახულა.

აჭარის სხვადასხვა მუნიციპალიტეტში ამ ეტაპისთვის 4 პროექტის მშენებლობა მიმდინარეობს, ხოლო 6 სპორტული ობიექტის პროექტის განხორციელება წლის ბოლოდან ეტაპობრივად დაიწყება. მშენებლობისა და რეაბილიტაციის მიმდინარეობას სისტემატურ მონიტორინგს უწევს აჭარის პროექტების მართვის კომპანიის ხელმძღვანელი ბაქარ ჩიტაია. ობიექტების მონახულება მუნიციპალური პროექტების მართვის კოორდინატორ გიორგი ქათამაძესთან და სამშენებლო კომპანიების წარმომადგენლებთან ერთად ხორციელდება.

შუახევის საფეხბურთო მოედნის და ღორჯომის სპორტული დარბაზის მშენებლობის სამუშაოები აქტიურად მიმდინარეობს. შუახევში, 500 მაყურებელზე გათვლილი საფეხბურთო სტადიონი მალე გაიხსნება. მოედანზე ხელოვნური ბალახის საფარი ორ კვირაში დაიგება. ტერიტორიის მზადება მწვანე საფარისთვის დასასრულს უახლოვდება. მოსწორდა ზედაპირი, დაიყარა შესაბამისი ბალასტი და მოიხრეშა. მზად არის მეტალის კარკასები მაყურებელთა ტრიბუნებზე პლასტმასის სკამების დასამონტაჟებლად. ასევე შშმ პირებისთვის განკუთვნილი სპეციალური იარუსი.

ხულოს მუნიციპალიტეტის სოფელ ღორჯომის ძალოსნობის სპორტ დარბაზის ორსართულიანი შენობა უკვე აშენებულია. მალე გადაიხურება, ჩაისმება კარ-ფანჯრები და შეიფუთება. რომლის შემდეგაც შიდა სარემონტო სამუშაოები დაიწყება. პროექტი მოიცავს სავარჯიშო დარბაზს, გასახდელებსა და საშხაპეებს, სამედიცინო კაბინეტსა და მწვრთნელების ოთახს. მოწყობილია პანდუსი. ობიექტთან იარსებებს ავტოსადგომი და კაფეტერიაც. მშენებელ კომპანიების მიმართ მთავარი მოთხოვნის თანახმად ყველა ობიექტი ადაპტირებული და შესაბამისი სტანდარტების დაცვით მოწყობილი იქნება.

აჭარის პროექტების მართვის კომპანიამ ღორჯომისა და შუახევის პროექტებზე ტენდერი გასულ წელს გამოაცხადა და მშენებლობის პროცესი წლის ბოლომდე უნდა დასრულდეს.

ნეტგაზეთის მასალების სხვა გამოცემებში გადაბეჭდვის წესი
ავტორი