უკრაინის სამხრეთში, აღმოსავლეთსა და ჩრდილოეთში ბრძოლების ფონზე, დიდი ბრიტანეთის დაზვერვა ყურადღებას უკრაინის საზღვართან მიმდინარე სამხედრო წვრთნებზე ამახვილებს.
„8 სექტემბერს, უკრაინის ჩრდილოელი მეზობლის, ბელარუსის სამხედროებმა დაიწყეს საველე წვრთნა, რომლის ამოცანაც „მტრის ძალების მიერ დაპყრობილი ტერიტორიების დაბრუნება“ და საზღვრების დაცვაა. წვრთნები 2022 წლის 14 სექტემბრამდე უნდა გაგრძელდეს,“ – მიუთითებს უწყება 9 სექტემბრის რელიზში და დასძენს, რომ სამხედრო სწავლება მინსკის გარშემო, ვიტებსკის რეგიონის ჩრდილო-აღმოსავლეთ ნაწილში, პოლონეთის საზღვართან იმართება.
დიდი ბრიტანეთის დაზვერვა იხსენებს, რომ ჯერ კიდევ ომის დასაწყისში, ბელარუსის ტერიტორიამ რუსეთის ოპერაციისთვის უმნიშვნელოვანესი როლი შეასრულა, თუმცა შეტევა კიევზე კრემლისთვის წარუმატებლად დასრულდა.
უწყება ხაზს უსვამს იმასაც, რომ ბელარუსის შეიარაღებული ძალების საბრძოლო შესაძლებლობები საკმაოდ შეზღუდულია, ამიტომაც „ნაკლებ სავარაუდოა, რომ ეს სწავლებები ერთგვარი მზადებაა უკრაინის ომში ბელარუსის ჩასართავად.“
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელი რელიზი ხერსონის კონტრშეტევას ეხებოდა. უწყება აღნიშნავდა, რომ უკრაინის არმიამ დარიკავსთან რუსების პონტონის ხიდი გაანადგურა.
