დიდი ბრიტანეთის დაზვერვის ინფორმაციით, ხერსონში უკრაინელთა კონტრშეტევა გრძელდება. უკრაინის არმიამ, სავარაუდოდ, გაანადგურა დარივკასთან მდებარე პონტონის სამხედრო ხიდი, რომელიც რუსებმა უახლოესი ხიდის დაზიანების შემდეგ მოაწყვეს.
„დარივკას გადასასვლელი დნეპრის გასწვრივ რუსეთის არმიის ჩრდილოეთ და სამხრეთ სექტორების დამაკავშირებელი ერთ-ერთი მთავარი გზაა,“ – აღნიშნავს უწყება 8 სექტემბრის რელიზში.
ბრიტანეთის დაზვერვის შეფასებით, უკრაინელთა ზუსტი დარტყმები დნეპრის გადასასვლელებზე აძლიერებს ზეწოლას რუსეთის არმიაზე, რომელიც კონტრშეტევასთან გამკლავებას ცდილობს.
უწყება მიუთითებს, რომ გადასასვლელების დაზიანება ხელს უშლის რუსეთის ძალებს, ეფექტიანად გამოიყენონ ოპერაციული რეზერვები და აღმოსავლეთიდან საბრძოლო მარაგები მიიღონ.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ განახლებაში უწყება წერდა, რომ მძიმე ბრძოლები გრძელდებოდა უკრაინის სამ ფრონტზე: ჩრდილოეთით – ხარკოვთან, აღმოსავლეთით – დონბასში და სამხრეთით – ხერსონის ოლქში.
„რუსეთის მთავარი ძალისხმევა, სავარაუდოდ, კვლავაც მიმართულია დონბასისკენ, ბახმუტის შეტევებზე, თუმცა მეთაურები არჩევანის წინაშე არიან – მიახმარონ ოპერაციული ძალები ამ შეტევებს თუ დაიცვან თავი უკრაინელთა კონტრშეტევისგან სამხრეთში,“ – აღნიშნავდა უწყება 7 სექტემბრის რელიზში.
___________________
ფოტოზე: უკრაინის საბრძოლო მოქმედებების რუკა 7 სექტემბრის მდგომარეობით. ფოტო: გაერთიანებული სამეფოს თავდაცვა
