ნეტგაზეთი • RU

როგორ დავეხმაროთ სკოლის დაწყების წინ ბავშვებს ღარიბი ოჯახებიდან

საქართველოს საჯარო სკოლებში საშუალო განათლების მიღება უფასოა, მაგრამ განათლებასთან დაკავშირებული ისეთი ხარჯები, როგორიცაა: სკოლის ფორმა, ჩანთა, საკანცელარიო ნივთები და სხვა, დიდ გავლენას ახდენს სიღარიბეში მცხოვრებ ბავშვებსა და ოჯახებზე.

სოციალურად დაუცველი ბავშვებისთვის სასკოლო ხარჯების ნაწილის დასაფარად ამჟამად შემოწირულობებს აგროვებს საქართველოს წითელი ჯვრის საზოგადოება.

ახალი სასწავლო წლისთვის მოსამზადებლად ბავშვებს სოციალურად დაუცველი მრავალშვილიანი ოჯახებიდან თანხა უგროვდებათ როგორც ნაღდი ფულით, ისე ონლაინ. წითელი ჯვრის დონაციის ყუთი ბათუმში განთავსებულია გორგილაძის#88-ში (მაღაზია „გუდვილში“).  ანგარიშის ნომერია: GE21BG0000000533402753

კიდევ ერთი გზა მოსწავლეების დასახმარებლად არის საქველმოქმედო ონლაინ პლატფორმა „ჩართე”, რომელიც საშუალებას გაძლევთ ჩაურთოთ ინტერნეტი სოციალურად დაუცველ უფროსკლასელებს. პროექტი საქართველოში 2017 წლიდან მუშაობს და მისი ავტორია საგანმანათლებლო ფონდი Educare Georgia. დონორებისა და მხარდამჭერების დახმარებით, ორგანიზაციამ უკვე 1945 მოსწავლე ჩართო პროექტში.

„ჩართეს“ გუნდის მონაცემებით, დღეს საქართველოში 78 000 სოციალურად დაუცველ მოსწავლეს არ აქვს ინტერნეტი. პროექტში თქვენს მიერ შეწირული თანხებით სოციალურად დაუცველ უფროსკლასელებს მთელი საქართველოს მასშტაბით უფინანსებთ ინტერნეტის ყოველთვიურ გადასახადს ან კომპიუტერს. შეგიძლიათ ამ მოსწავლეებისთვის თანხა გაიღოთ როგორც ერთჯერადად, ისე ყოველთვიურად.

„ჩართეს“ ცნობით, 2022 წლის მაისში, ივლისსა და აგვისტოში აჭარის მაღალმთიანეთის სოფლებში 103 მოსწავლემდე მიიტანეს ლეპტოპები და ინტერნეტთან წვდომა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან