„ჩართე“ საქველმოქმედო პლატფორმაა, რომელზეც შეგიძლიათ, თუნდაც 1 ლარად და სულ რაღაც 3 წუთში დაუფინანსოთ ინტერნეტი ან ლეპტოპი სოციალურად დაუცველ უფროსკლასელებს – ვკითხულობთ “ჩართეს” ფეისბუქგვერდზე.
მარი გელაშვილი, „ჩართეს“ საოპერაციო მენეჯერი, ამბობს, რომ „ჩართე“ 2017 წლიდან არსებობს და მაისში ზუსტად 3 წელი გახდება, რაც პროექტმა აქტიური მუშაობა დაიწყო.
„ამჟამად 500-მდე მოსწავლეა, რომელსაც გადავეცით კომპიუტერი და ყოველთვიურად charte.ge-ს ონლაინშემომწირველების დახმარებით, ინტერნეტის გადასახადს ვუხდით.
ბენეფიციარების შესარჩევად ვუკავშირდებით ადგილობრივ სკოლებს და ისინი გვაწვდიან დოკუმენტაციას მათ შესახებ. შერჩევის კრიტერიუმებია: საშუალო საფეხურის მოსწავლე (მე-10,მე-11,მე-12-კლასელი), რომელსაც აქვს სოციალურად დაუცველის სტატუსი (70 ათასი ქულის ქვემოთ) და არ აქვს სახლში კომპიუტერი ან/და ინტერნეტი“.
“ჩართეს” ერთ-ერთი ბენეფიციარია 17 წლის დიმა კვარაცხელია, რომელიც წალენჯიხის მუნიციპალიტეტის სოფელ ჯვარში ცხოვრობს. მან საკუთარი ინიციატივით შექმნა საინფორმაციო სააგენტო „ჯვარინიუსი“, რომელიც აშუქებს ახალ ამბებს. დიმა თავადაა „ჯვარინიუსის“ დამფუძნებელი, ოპერატორი, რეჟისორიც და პროდიუსერიც. “ჩართემ” მას ლეპტოპი გადასცა.
მედო 17 წლისაა, ის ამბობს, რომ “ახალგაზრდისთვის მნიშვნელოვანია ჰქონდეს პირადი სივრცე, სადაც რასაც გინდა იმას უყურებ, რასაც გინდა იმას გააკეთებ. სანამ უნივერსიტეტში ჩააბარებ, მომზადება გჭირდება, ან უბრალოდ ტესტები უნდა გაიარო, რომ გქონდეს იმის გამოცდილება, თუ რისი ჩაბარება გიწევს,“ – ამბობს მედო.
“ჩართეს” ბენეფიციარი მედო
„დღეს განსაკუთრებით აქტუალური გახდა ინტერნეტთან და ტექნოლოგიებთან ხელმისაწვდომობის საკითხი. ქვეყნის სკოლების ონლაინსწავლებაზე გადასვლის ერთ-ერთი შემაფერხებელი ფაქტორი ისიც არის, რომ ბევრ ადამიანს საქართველოში არ მიუწვდება ხელი ინტერნეტზე. ჩვენი ორგანიზაცია „ედუქეარ ჯორჯია“ უკვე 5 წელია ონლაინგანათლების პოპულარიზაციაზე მუშაობს და „ჩართეს“ შექმნაც გარკვეულწილად ამ მიზნის გაგრძელება იყო, „ჩართემდე“ კი „ხანის აკადემიის“ ქართული ვერსიის შექმნა დავიწყეთ. საბოლოო ჯამში, ჩვენი მიზანია, ინტერნეტზე ხელმისაწვდომობით გავზარდოთ წვდომა მსოფლიო დონის განათლებაზეც,“ – ამბობს მარი გელაშვილი.
ახლა, როცა დისტანციური სწავლის საკითხი განსაკუთრებით აქტუალურია, მარი გელაშვილი რამდენიმე საგანმანათლებლო პლატფორმას უწევს რეკომენდაციას:
„პირველ რიგში, მოსწავლეებისთვის რეკომენდაციას გავუწევდი ხანის აკადემიას, სადაც უფასოდ, ქართულ ენაზე ხელმისაწვდომია მათემატიკის, ფიზიკის, ქიმიის, ბიოლოგიის და პროგრამირების გაკვეთილები. პლატფორმას ყოველთვიურად 80 ათასი უნიკალური მომხმარებელი ჰყავს, ვებგვერდზე კი მილიონზე მეტი ვიზიტორია ნამყოფი. ამ პერიოდში, როდესაც ბევრი ადამიანი სახლშია, ჩემი პირადი გამოცდილებით, ყველას ვურჩევდი Edx.org-ს, Coursera.org-ს, Classcentral.com-ს და Futurelearn.com-ს, ყველაზე სანდო და მრავალფეროვან ონლაინსაგანმანათლებლო პლატფორმებს, სადაც ნებისმიერ ადამიანს უფასოდ შეუძლია მისთვის საინტერესო თემის შესწავლა და ზოგადად, ამ რესურსების თვითგანვითარებისთვის გამოყენება.”
როგორ ჩავრთო?
- შედით საიტზე charte.ge და აირჩიეთ ღილაკი „მე ჩავრთავ“;
- აირჩიეთ თანხის რაოდენობა, რომელიც გსურთ ყოველთვიურად ავტომატურად ჩამოგეჭრათ ბარათიდან;
- შეიყვანეთ პირადი და საბანკო მონაცემები.
