ბურიატიის სოფელ ოიმურის მცხოვრებს, უმცროსი ვაჟი უკრაინაში 27 თებერვალს დაეღუპა. თავის დროზე, მამამ თავად ურჩია შვილს, არმიაში ემსახურა, რადგან მათ სოფელში სამუშაო არ იყო. შვილის დაკრძალვის შემდეგ, რინატ სადიკოვი თვითონაც მოხალისედ წავიდა ომში, უნდოდა გაეგო „რისთვის იბრძოდნენ და რისთვის დაიღუპა 22 წლის ვაიჩესლავი.“
ორი თვის შემდეგ, ბურატიაში დაბრუნებული რინატ სადიკოვი ამბობს, რომ ეს ომი უაზრობაა.
„და რა ხდება იქ? ასე იოლად რატომ იმეტებენ ჩვენს ბიჭებს? ახლა ვნახე… მე როგორც ვხვდები, ჩვენ არმია არ გვყავს. წადი იქ. თვითონაც არ ვიცი, სად. ვინც ჩვენთან ერთად იბრძოდა იქ, ერთი ჩეჩნეთში იყო ნამყოფი, მეორე სირიაში, ისინი ამბობდნენ, ვერც შევადარებთ, ასეთი ომი ჩვენ ჯერ არ გვინახავსო. უაზრობაა, ჩემი აზრით, ეს ყველაფერი,“ – ნაწყვეტ-ნაწყვეტ ლაპარაკობს რინატ სადიკოვი და Сибирь.Реалии-ს ჟურნალისტებს ტელეფონში შვილის ფოტოებს უჩვენებს.
ერთ ფოტოზე ვიაჩესლავი ძმასთანაა, მეორეზე ცხენით სეირნობს, მესამეზე მეგობარ გოგონასთან ერთად. როგორც მამა იხსენებს, შვილმა წასვლისას უთხრა, რომ ბელარუსში წვრთნებზე მიდიოდა.
„წვრთნებზე წავიდნენ ბელარუსში. ერთობლივ წვრთნებზე. მერე იქით (უკრაინაში) უკრეს თავი. ჩავიდნენ ბელარუსში და მანამდე, ერთი დღით ადრე, ახალ ამბებს ვუყურებდი, როცა უკვე დაიწყო, ომი ხომ 24-ში დაიწყო? ამბობდნენ, ჩვენი მხრიდან დანაკარგი არ არისო. აჰ, კარგი… მერე ისინი (სამხედრო კომისარიატის ხალხი) მოდიან და მეუბნებიან… და ვის დავუჯერო?“
ომში გატარებულ ორ თვეზე რინატ სადიკოვი თითქმის არ ლაპარაკობს. ამბობს მხოლოდ იმას, რომ მისთვის ახლაც გაუგებარია, ვის და რატომ ებრძოდნენ.
„და იქ ვის ვებრძვით რო? ჩვენები არიან. იქ ფოტოალმბომებს ვპოულობდით. აი ვხედავთ, რომ ის ავღანეთში ყოფილა. და ახლა ერთმანეთს ვებრძვით, რა არის ახლა ეს? ზოგჯერ, ხელის აწევაც კი მიჭირს რაღაცნაირად, ჩათვალე, ისიც ჩვენიანია. და რისთვის ვიბრძვით, არაფრისთვის? რამდენი გვყავს ახლა დაღუპული, ჩვენი მხრიდან? ათასობით, ჯანდაბა!“
ბურიატია რუსეთის ერთ-ერთი რეგიონია, რომელსაც ყველაზე მეტი დაღუპული ჰყავს უკრაინაში. რუსეთის ხელისუფლებისა და მედიის მონაცემებით, ბურიატიაში 15 აგვისტოსთვის უკვე 245 სამხედრო დაკრძალეს.
რინატ სადიკოვი – მოკლული ჯარისკაცის მამა
ჯერ კიდევ ივნისში „მედიაზონამ” გამოაქვეყნა კვლევა, რომლის თანახმადაც, ჟურნალისტებმა და მოხალისეებმა უკრაინაში დაღუპული 3 798 რუსი ჯარისკაცის მონაცემების დადგენა შეძლეს. მათგან ყველაზე მეტი მსხვერპლი დაფიქსირდა დაღესტანში (207 ჯარისკაცი) და შემდეგ ბურიატიაში (164).
სხვადასხვა წყაროს ცნობით, უკრაინაში 5-დან 10 ათასამდე ბურიატი იბრძვის.
რუსეთის ხელისუფლება უკრაინაში დაღუპული სამხედროებისა და განადგურებული ტექნიკის რაოდენობას არ ასაჯაროებს, უკრაინის გენშტაბის მონაცემებით კი, რუსეთის დანაკარგი უკვე 50 000 სამხედროა.
ავღანეთში 10 წლის განმავლობაში საბჭოთა კავშირის დანაკარგი იყო 50 ათასი დაღუპული და დაჭრილი სამხედრო.
წყარო: Сибирь.Реалии, Настоящее Время.
მთავარ ფოტოზე: ვიაჩესლავ სადიკოვის საფლავის ქვა/ფოტო: Сибирь.Реалии (RFE/RL)
რუსეთი საზარბაზნე ხორცად გვიყენებს – 500-მდე ბურიატმა უკრაინაში ბრძოლაზე უარი თქვა
