აჭარაში დედათა და ბავშვთა თავშესაფრით უზრუნველყოფის პროგრამის დაფინანსება და ბენეფიციართა რაოდენობა ხუთით გაიზარდა. აჭარის ჯანდაცვის სამინისტროს ცნობით, ანალოგიური ცვლილებები მომდევნო წლიდანაც იგეგმება.
პროგრამა ითვალისწინებს სხვადასხვა პრობლემის მქონე, მარტოხელა, ძალადობაგანცდილი, მიუსაფარი დედებისა და ბავშვების 24-საათიანი თავშესაფრით უზრუნველყოფას, ბენეფიციარებისთვის სადღეღამისო მომსახურებას სამჯერადი კვებით, ასაკის, სქესის, სეზონის შესაბამისი ტანისამოსითა და ჰიგიენის ნივთებით უზრუნველყოფას, ფსიქოლოგიურ დახმარებას, პროფესიული და არაფორმალური განათლების ხელშეწყობას, დასაქმებაში დახმარებას, საჭიროების შემთხვევაში სამედიცინო მომსახურების ორგანიზებას, სოციალური უნარ-ჩვევების სწავლებას და ა.შ.
აქამდე პროგრამით სარგებლობა 35 ბენეფიციარისთვის იყო შესაძლებელი, წელს, ამ ეტაპზე, სერვისით 40 ბენეფიციარი სარგებლობს, მათ შორის 3 შშმ პირია. პროგრამის ბიუჯეტი 344 818 ლარია.
„ყველა ქალს, რომელიც ძალადობის მსხვერპლია და არ აქვს საშუალება დამოუკიდებლად იცხოვროს, შეუძლია მიმართოს ჯანდაცვის სამინისტროს და მოვიდეს ჩვენთან. პროგრამა მთლიანად მოიცავს ბენეფიციართა საჭიროებებს,“ – ამბობს პროგრამის განმახორციელებელი, თავშესაფრის ხელმძღვანელი, ნანა საყვარელიძე.
დედათა და ბავშვთა თავშესაფრით უზრუნველყოფის პროგრამას აჭარის ჯანდაცვის სამინისტრო 2013 წლიდან ახორციელებს. პროგრამით გათვალისწინებული მომსახურებით ისარგებლებენ საქართველოს მოქალაქეები, რომლებიც რეგისტრირებულნი არიან აჭარის ავტონომიური რესპუბლიკის ტერიტორიაზე.
____________
ამავე თემაზე:
“ბავშვის გაჩენისთვის ქალს არ უნდა აგდებდნენ” – 11 წელი შშმ პირებისა და მარტოხელა დედების გვერდით
