ნეტგაზეთი • RU

იდუმალი სტუმარი – რამდენ რესტორანს შეამოწმებენ აჭარაში

აჭარაში მდებარე კაფეებსა და რესტორნებს იდუმალი სტუმრის დახმარებით შეამოწმებენ.

ბათუმში და აჭარის ხუთ მუნიციპალიტეტში: ქობულეთში, ხელვაჩაურში, ქედაში, შუახევსა და ხულოში სულ 100 კვების ობიექტი შემოწმდება იდუმალი სტუმრის მეთოდით.

ეს ნიშნავს, რომ წინასწარ შერჩეულ კვების 100 ობიექტზე მივა სტუმარი, დაათვალიერებს რესტორნის ან კაფეს ინტერიერს (მათ შორის, ჰიგიენის წერტილებს) და შეუკვეთავს კერძებს. შემდეგ, წინასწარ შედგენილი კითხვარის საფუძველზე, შეაფასებს როგორც კერძების, ისე მომსახურების ხარისხს.

„წლების განმავლობაში ვიკვლევთ კვებისა და განთავსების ობიექტებს. თუმცა წელს გადავწყვიტეთ, რომ მხოლოდ კვების ობიექტებზე გაგვეკეთებინა კვლევა, რადგან პანდემიამ ძალიან დააზარალა ეს მიმართულება. გვსურდა ზუსტად გამოგვეკვლია, თუ რა გამოწვევები აქვს ამ სექტორს.

პანდემიის დროს დიდი ოდენობით პროფესიული კადრები გაედინა სექტორიდან. ბიზნესმა აიყვანა ახალი. გვაინტერესებს, ამ ახალი კადრების პირობებში რა გამოწვევების წინაშე დგას სექტორი. რადგან ჩვენი სურვილია როგორც ახალი, ისე ის კადრები, რომლებიც დარჩა და აგრძელებს მუშაობას, კიდევ უფრო უკეთესები გავხადოთ, გადავამზადოთ,“ – უთხრა „ბათუმელებს“ აჭარის ტურიზმისა და კურორტების დეპარტამენტის დირექტორის მოადგილემ თამარ კაიკაციშვილმა.

აჭარის ტურიზმისა და კურორტების დეპარტამენტის დირექტორის მოადგილე თამარ კაიკაციშვილი

მისივე თქმით, გასულ წელს ტურიზმის დეპარტამენტმა ანალოგიური კვლევა სოფლად და მუნიციპალიტეტებში არსებულ საოჯახო სასტუმროებში ჩაატარა.

„პროექტი იდუმალი სტუმარი არის შემუშავებული იმისათვის, რომ გავიგოთ სექტორის წინაშე არსებული გამოწვევები, სად აქვთ  სუსტი რგოლი, რა სეგმენტში სჭირდებათჩვენი (დეპარტამენტის) დახმარება.

ასევე, ვაფასებთ რამდენად შეიცვალა სურათი. რამდენად გაუმჯობესდა, იმავე პოზიციაზე ან განიცადა უკუსვლა. ჩვენი გამოცდილებით სერვისის მიმართულებით გვაქვს წინსვლა, ზოგან ეს შეიძლება იყოს თვალსაჩინო, ზოგან კი მცირე პროგრესია,“ – ამბობს თამარ კაიკაციშვილი.

კვების ობიექტების მომსახურების ხარისხის კვლევას აჭარის ტურიზმის დეპარტამენტის დაკვეთით კვლევითი ორგანიზაცია „ბი-სი-ჯი“ ჩაატარებს. ამ კომპანიამ დეპარტამენტის მიერ გამოცხადებულ ტენდერში გაიმარჯვა.

კვლევა სამი თვის განმავლობაში (აგვისტო, სექტემბერი, ოქტომბერი) ჩატარდება და ამისთვის ბიუჯეტიდან 21 670 ლარი დაიხარჯება.

თამარ კაიკაციშვილის განმარტებით, წლის ეს დრო საგანგებოდ შეირჩა, რადგან შეემოწმებინათ, სარესტორნო ბიზნესი როგორ ართმევს თავს დატვირთულ სეზონს.

„ახლა არის ცხელი სეზონი, ამიტომ გვაინტერესებს, როდესაც დატვირთვა მეტია, კრიტიკული სიტუაციაა, ამ დროს როგორ ართმევს სექტორი თავს.  ასევე გვაინტერესებს მილევად, პასიურ და გარდამავალ პერიოდშიც სექტორის შესაძლებლობები.

კარგი იქნებოდა, მთელი წლის განმავლობაში ვაკვირდებოდეთ სექტორს, მაგრამ ამას ფინანსები სჭირდება. იმ ფინანსების გათვალისწინებით, რაც ამ პროგრამისთვის არის გამოყოფილი, სწორი დრო უნდა შევარჩიოთ. სწორი დრო არის ის დრო, როცა სექტორის განწყობები, ქცევები და სერვისის ხარისხის დონე უფრო უკეთესად შეგვიძლია დავინახოთ,“ – ამბობს თამარ კაიკაციშვილი.

მომსახურების სექტორში კვლევას აჭარის ტურიზმისა და კურორტების დეპარტამენტი 2014 წლიდან ატარებს. როგორც დეპარტამენტში ამბობენ, კვლევას წლების განმავლობაში დადებითი დინამიკა აქვს, თუმცა არის გამოწვევები, რომლებიც უნდა გამოსწორდეს.

„2014 წლიდან დღემდე პროგრესი ნამდვილად არის, მაგრამ ჯერ არა ისეთი, როგორიც ჩვენ გვსურს და გვინდა, რომ იყოს.

თუმცა ვერც იმას ვიტყვით, რომ ჩამოვრჩებით პროცესებს. იმ ტენდენციებს, რა ტენდენციებიც არის სერვისის მიმართულებით, მივსდევთ. ეს პროექტი ჩვენთვის არის სახელმძღვანელო. რადგან აქედან მიღებული შედეგების განზოგადების შემდგომ ვგეგმავთ ჩვენს სატრენინგო და საგანმანათლებლო აქტივობებს მთელი წლის განმავლობაში.

ასე იყო, მაგალითად, სოფლის გესთჰაუსების კვლევის შემთხვევაში, აქ ამოვიდა მთელი რიგი საკითხები, რომლებზეც ჩვენ მყისიერად იმავე წელსვე დავიწყეთ მოქმედებები. ხუთივე მუნიციპალიტეტის 26 სოფელში ჩავატარეთ ტრენინგები კვლევის შემდგომ,“ – ამბობს თამარ კაიკაციშვილი.

ნეტგაზეთის მასალების სხვა გამოცემებში გადაბეჭდვის წესი
ავტორი