ნეტგაზეთი • RU

დენის დიკი, უკრაინის ცოცხალი გმირი – „ჩვენ რომ გავქცეულიყავით, აქ ბუჩა დატრიალდებოდა“

სუმის ოლქის ქალაქ ოხტირკას ერთ თვეზე მეტხანს იცავდნენ უკრაინელი ჯარისკაცები.

უკრაინის შეიარაღებული ძალების ერთ-ერთი სამხედრო ნაწილის მეთაურს, პოლკოვნიკ დენის დიკის, ამ ბრძოლებში გამოჩენილი სიმამაცისთვის უკრაინის გმირის წოდება მიენიჭა.

დენის დიკის შესახებ უკრაინის თავდაცვის ძალების საინფორმაციო გამოცემა „Armyinform” წერს.

როგორც ის იხსენებს, 24 თებერვალს დილის 4 საათზე დაურეკა უკრაინის უსაფრთხოების სამსახურის რაიონული განყოფილების უფროსმა და აცნობა, რომ რუსებმა საზღვრის დაბომბვა დაიწყეს. დენის დიკიმ მორიგე ქვედანაყოფის შეკრების ბრძანება გასცა, განგაში ჩაირთო და დილის 5 საათზე მთელი პოლკი ადგილზე იყო. ძალიან ბევრი ხალხი შეიკრიბა ქალაქის, ქვეყნის დასაცავად.

იყვნენ რეზერვისტები და უბრალოდ გულისხმიერი ადამიანები. ადგილობრივი მცხოვრებლების დახმარებით მესაზღვრეებმა უკვე იცოდნენ მტრის რამდენი ტანკისგან შემდგარი კოლონა მიემართებოდა ქალაქისკენ. ხუთი საათის შემდეგ ოკუპანტები უკვე ქალაქში იყვნენ.

დენის დიკი

„გვესმოდა, რომ მტრის მძიმე ტექნიკასთან ბრძოლა გაგვიჭირდებოდა, რადგან ტანკსაწინააღმდეგო იარაღი ცოტა გვქონდა. დილის 8-9 საათზე ტანკსაწინააღმდეგო ყუმბარმტყორცნები გამოგვიგზავნეს.

ქალაქის ირგვლივ დაცვა გავამაგრეთ. ჩავუსაფრდით მტრის კოლონის მოძრაობას. ტანკსაწინააღმდეგო ყუმბარმტყორცნები შენობების სახურავებზე დავაყენეთ. რა თქმა უნდა, გაქცევას არ ვაპირებდით, მთავარსარდლისაგან ბრძანება მივიღე, რომ ქალაქის დაცვაზე ამეღო პასუხისმგებლობა. ჩვენ რომ გავქცეულიყავით, აქ ბუჩა და ტროსტიანე დატრიალდებოდა“ – იხსენებს დენისი.

ხარკოვსა და სუმში თავდაცვის დანაყოფი მთელი თვის განმავლობაში იცავდა ოხტირკას და მოწინააღმდეგეს ქალაქში შესვლის საშუალებას არ აძლევდა. ძირითადი შემადგენლობა ქალაქის სტრატეგიულ ადგილებს იცავდა. აღმართეს ბარიკადები, გააკეთეს ყველაფერი, რაც მოასწრეს, მაგრამ მტერი შეჭრისთანავე ძალიან სწრაფად მიიწევდა წინ.

როცა რუსებმა ქალაქის შუაგულამდე შეაღწიეს დენისმა მეგობრები, სამოქალაქო პირები შეკრიბა და სთხოვა მათ სამხედრო ნაწილისთვის ედარაჯათ და პოლკის „ყურებად“ და „თვალებად“ ქცეულიყვნენ.

ამ დროს უკრაინული სამხედრო დანაყოფების სიახლოვეს სამოქალაქო მანქანებით გადაადგილდებოდნენ მზვერავები რუსული ფორმებით. მერე რაშისტების კოლონას უკრაინელმა სამხედროებმა სახურავიდან გაუხსნეს ცეცხლი, ამოუყირავეს საბრძოლო მასალებით სავსე სატვირთო მანქანა და დაუზიანეს ტანკები. ეს იყო პირველი ბრძოლა ქალაქისთვის.

„ტყვია-წამლიან მანქანას დავარტყით და ავაფეთქეთ. შემდეგ „ტაიფუნებს“ და სხვა ტიპის საბრძოლო მანქანებს დავარტყით. რუსი ჯარისკაცების ნაწილი ტყვედ ავიყვანეთ, ნაწილს ვუთვალთვალებდით.

რუსებმა სამწუხაროდ ჩვენი ერთ-ერთი ჯარისკაცი შეიპყრეს ტერიტორიული თავდაცვის დანაყოფიდან. შემდეგ ჩვენ მისი სხეული ვიპოვეთ…

ჩვენებმა ორი კვირის განმავლობაში ტყეებში 15 რუსი ჯარისკაცი აიყვანეს ტყვედ.

ოკუპანტების მიერ დაბომბილი ოხტირკა

ასე წარიმართა პირველი ბრძოლა. მათ აიღეს ჩვენი შტაბ-ბინა, სადაც უამრავი საიდუმლო დოკუმენტი იყო. ჩემი ბიოგრაფია, მონაცემები სუმის რეგიონის ქვედანაყოფების ყველა მეთაურის შესახებ, მარშრუტების ვარიანტები, რითაც გადაადგილება შეეძლოთ და ბევრი ახალი იარაღი.

ჩვენს მიერ მოპოვებული ოკუპანტების სამხედრო ტექნიკა ხოლოდნოიარსკის ბრიგადას გადაეცა. ასე დაიწყო ჩვენთვის ომი“, – იხსენებს დენის ძიკი.

მეორე დღეს პოლკი გადაიარაღდა, ერთდროულად რამდენიმე სამხედრო დავალებას ასრულებდნენ, ჯარისკაცები ნაღმავდნენ და აფეთქებდნენ ხიდებს მტრის გზაზე.

რუსებმა შემოსვლა კირიკოვკას მხრიდან სცადეს, სადაც მათ უკვე ხოლოდნოიარსკის ბრიგადის ჯარისკაცები დახვდნენ. იყო სასტიკი სატანკო ბრძოლა, რომელიც ნახევარი დღე გაგრძელდა. განადგურდა უამრავი რუსული ტექნიკა და პერსონალი. უკრაინელთა დანაკარგები კი უმნიშვნელო იყო.

დენისი მწუხარებით იხსენებს ბრძოლის მესამე დღეს:

„ბრძოლის მესამე დღე ყველაზე საშინელი იყო ჩვენი ქვედანაყოფის ისტორიაში. პირველ საათზე ჩვენს დანაყოფს ორი ბომბი და ერთი რაკეტა ესროლეს. ბომბი პირდაპირ ყაზარმას დაეცა, სადაც იარაღს ვინახავდით და თან სადილობდნენ ჯარისკაცები. ბევრი ადამიანი დავკარგეთ. ბიჭებისგან არავინ გაქცეულა, დაიწყეს დაჭრილების გამოყვანა და სამედიცინო ცენტრში გადაყვანა. რაკეტა პირდაპირ სამედიცინო ცენტრს ესროლეს. იყვნენ დაღუპულები და დაჭრილებიც. იმ დღეს დაიღუპა 54 ადამიანი, ჩვენი ქვედანაყოფიდან 30, ამ დროისთვის დაკარგულად კიდევ 15 ადამიანი ითვლება.

5 დღის შემდეგ რაშისტულმა ავიაციამ ოხტირკაზე აქტიური საჰაერო თავდასხმა დაიწყო. ჯერ თბოელექტროსადგური და ნავთობის საცავი ააფეთქეს, გაანადგურეს სადგური, მერია და ცენტრალური უნივერმაღი.

ოკუპანტების თავდასხმა უკრაინის სუმის ოლქის ქალაქ ოხტირკაზე

საზენიტო თავდაცვის საშუალებები არ გვქონდა მაგრამ მალევე მოგვაწოდეს სტინგერები. სწრაფად ვასწავლიდით ხალხს მათ გამოყენებას“, – იხსენებს დენისი.

საკუთარ თავზე მოკრძალებით საუბრობს:

„თავი გმირად არ მიმაჩნია, რადგან მეთაურისთვის გმირი მისი ხალხია. ნამდვილი გმირები ისინი არიან. მამაცი პოლკი. როცა ბრძოლები დაიწყო, არც შიში ჰქონდა ვინმეს, არც პანიკა იგრძნობოდა. შევკრიბე ქვედანაყოფების მეთაურები, გავამხნევე ჯარისკაცები და ავუხსენი ყველას, რომ ჩვენი მიწიდან არსად წავიდოდით.

პირველი ბრძოლის შემდეგ ყველაფერი გამარტივდა, ცოტა სხვაგვარად დავიწყე ყველაფრის აღქმა, შიში საერთოდ გამიქრა, ჩვენ უკან არ დაგვიხევია, არ გავქცეულვართ, ფიცი არ გავტეხეთ და ავიტანეთ ყველაფერი. დავიცავით ქალაქი“.

დენის დიკის სწორედ ამ ნიშნით გადასცა უკრაინის პრეზიდენტმა გმირის „ოქროს ვარსკვლავი“ – განსაკუთრებული გამბედაობის, გმირობის და უკრაინის სახელმწიფო სუვერენიტეტისა და ტერიტორიული მთლიანობის დაცვისთვის.


წყარო: Armyinform

ფოტო: უკრაინის თავდაცვის ძალები

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com