დაღუპულთაგან ზოგიერთს ხელები ზურგზე ჰქონდა შეკრული და ტყვია თავში ნასროლი.
ბუჩაში რუსეთის უკრაინაზე თავდასხმის შედეგად დაღუპული 458 ადამიანის ცხედარია ნაპოვნი. ბუჩის რადას ცნობით, მათგან 419 ადამიანი რუსეთის შეიარაღებული ძალების ჯარისკაცების მიერაა მოკლული. მოკლულებს შორის 12 ბავშვია.
ამის შესახებ გუშინ, 8 აგვისტოს, განაცხადა პრესკონფერენციაზე ბუჩას მერის მოადგილემ, მიხაილინა სკორიკ-შკაროვსკაიამ.
მისი თქმით, დაღუპულთაგან 366 კაცია, 86 – ქალი, 5 ადამიანის სქესი ამოუცნობია, რადგან ცხედრები დამწვარია. ასევე, ნაპოვნია 1 ჩანთა სხეულის ნაწილებით, რომლის იდენტიფიცირება შეუძლებელია.
მერის მოადგილემ განაცხადა, რომ 116 ცხედარი ეკლესიასთან ახლოს, საერთო სამარხში იპოვეს, 50-ზე მეტი ცხედარი კი არ იყო დაკრძალული.
მან ხაზგასმით აღნიშნა, რომ დაღუპულთა უმეტესობას ქალაქიდან ევაკუაციის დროს ესროლეს.
კიევთან ახლოს მდებარე ქალაქი ბუჩა რუსეთ-უკრაინის ომში რუსეთის სისასტიკის მაგალითია – იქ, რუსეთის არმიის სხვა დანაყოფებთან ერთად, 35-ე საერთო საჯარისო არმიის 64-ე ცალკეული მოტომსროლელი ბრიგადა იდგა. ბუჩას დეოკუპაციის შემდეგ სწრაფად გავრცელდა ფოტო და ვიდეომასალა, რომელიც ასახავს ბუჩაში მშვიდობიანი მოქალაქეების წინააღმდეგ ჩადენილ ომის დანაშაულს.
_____________
ფოტოზე: ბუჩა დეოკუპაციისას, ცხედები ქალაქის ქუჩაში.
