ნეტგაზეთი • RU

რუსები ჯარისკაცებს ღამით ზაპოროჟიეს ატომურ სადგურში ასვენებენ – ბრიტანეთის დაზვერვა

გაერთიანებული სამეფოს დაზვერვის სამსახური 5 აგვისტოს მონაცემებში ზაპოროჟიეს ატომურ ელექტროსადგურზე არსებულ მდგომარეობას მიმოიხილავს. დაზვერვის ცნობით, ოკუპაციის 5 თვის შემდეგაც გაურკვეველია, თუ რა განზრახვები აქვთ რუსებს ამ სადგურთან.

როგორც განახლებულ მონაცემებში ვკითხულობთ, სავარაუდოდ, რუსების მიერ განხორციელებულმა ქმედებებმა შეარყია ზაპოროჟიეს ატომური ელექტროსადგურის უსაფრთხოება და დაცულობა.

რუსები, სავარაუდოდ, ზაპოროჟიეს ატომური ელექტროსადგურის დაცულ სტატუსს იყენებდნენ, რათა სამხედროები უსაფრთხოდ მოესვენებინათ ღამის განმავლობაში, ხოლო მიმდებარე რეგიონებიდან მიზანში იღებდნენ მდინარე დნეპრის დასავლეთ სანაპიროზე უკრაინულ ტერიტორიებს.

„რუსი სამხედროები, სავარაუდოდ, მოქმედებენ ელექტროსადგურის მიმდებარე რეგიონებში და ამ ტერიტორიებზე განლაგებულ სამხედრო დანაყოფებს იყენებენ მდინარე დნეპრის დასავლეთ სანაპიროზე უკრაინული ტერიტორიების მიზანში ამოსაღებად.

რუსმა სამხედროებმა სავარაუდოდ გამოიყენეს ობიექტის კიდევ უფრო ფართო არეალი, კერძოდ მიმდებარე ქალაქი ენერგოდარი, რათა დაცული სტატუსის გამოყენებით, მათ აღჭურვილობასა და პერსონალზე ღამით უკრაინელთა თავდასხმების რისკი შეემცირებინათ და დაესვენებინათ სამხედროები“, – ვკითხულობთ ბრიტანული დაზვერვის მონაცემებში.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან