Batumelebi | “დევნილთა დასახლებაში” მომხდარი მკვლელობის საქმე “დევნილთა დასახლებაში” მომხდარი მკვლელობის საქმე – Batumelebi
RU | GE  

“დევნილთა დასახლებაში” მომხდარი მკვლელობის საქმე

მთელი პროცესის მიმდინარეობის დროს, როცა მოსამართლე თამარ ბეჟანიშვილი მკვლელობის საქმეს განიხილავდა, მოკლულის დედა სასამართლოს ფოიეში იჯდა და ხმამაღლა ტიროდა. ის მკვლელის უმკაცრესად დასჯას ითხოვდა. დედა სასამართლოს საბოლოო გადაწყვეტილებას ელოდა, თუმცა სამუშაო დროის ამოწურვის გამო, მოსამართლემ გადაწყვეტილების გამოცხადება მომდევნო სხდომისთვის გადადო. სასამართლომ ასევე უნდა მოისმინოს მკვლელობაში ბრალდებულის საბოლოო სიტყვა. ამ საქმის განხილვაზე დასასწრებად მსურველთაგან ბევრი პროცესს თავისუფალი ადგილების არარსებობის გამო ვერ დაესწრო.

მკვლელობა გასული წლის 9 სექტემბერს მოხდა ბათუმში, ე.წ. დევნილთა დასახლებაში. ბრალდებულმა მ.გ.-მ მოკლა პირი, რომელმაც მანამდე ბრალდებულის ახლობელი მოკლა დანით. მკვლელობებს წინ უსწრებდა სიტყვიერი ურთიერთშელაპარაკება.

„მკვლელობაში ბრალდებული აუცილებელი მოგერიების ფარგლებში მოქმედებდა. მან მკვლელი მოკლა“ – ამბობს ადვოკატი რამინ პაპიძე.

საქმის მასალების მიხედვით, შეხვედრაზე, სადაც ორი პირი მოკლეს, არასასურველი სიძე უნდა შერიგებოდა ცოლის ძმას. ძმა დას იმიტომ გაუნაწყენდა, რომ მან ოჯახი [ქმარი და ორი შვილი] მოულოდნელად მიატოვა და ახალი ოჯახი შექმნა. „ახალი სიძე გამუდმებით ურეკავდა ცოლის ძმას და სთხოვდა შეხვედრას. საბოლოოდ შეხვედრა დევნილთა დასახლებაში შედგა, სადაც შეიკრიბნენ ორივე მხარის რამდენიმე მეგობარი და ნათესავი“ – ამბობს ადვოკატი რამინ პაპიძე

შეხვედრაზე სიტყვიერი შეურაცხყოფების შემდეგ, მ.შ.-მ [სიძის მეგობარი] დანით მძიმედ დაჭრა ქალის ძმა და მოკლა ქალის დეიდაშვილი. ამის შემდეგ ქალის ძმის ნათლულმა მ.გ.-მ ასევე დანით მოკლა მ.შ.

ბრალის დამკიცების შემთხვევაში, მ.გ.-ს 7-დან 15 წლამდე თავისუფლების აღკვეთა ელოდება. განზრახ მკვლელობის გარდა, მას ასევე ბრალად ედება იარაღის უკანონო ტარება, რასაც ბრალდებული დაკავების დღიდან აღიარებს.

ნეტგაზეთის მასალების სხვა გამოცემებში გადაბეჭდვის წესი
ავტორი