ნეტგაზეთი • RU
omi

პუტინმა სამხრეთის მეთაური დვორნიკოვი შეცვალა: ვინ არის სერგეი კუზოვლევი

უკრაინული მედიის ცნობით, რუსეთის სამხედრო სარდლობამ სამხრეთის ოლქის სამხედრო მეთაურის მოვალეობის შემსრულებლად სერგეი კუზოვლევი დანიშნა. თავის დროზე ის „სახალხო მილიციის“ ხელმძღვანელობდა ეგრეთ წოდებულ „ლნრ“-ში.

შესაბამისად, გენერალი ალექსანდრე დვორნიკოვი, რომელიც უკრაინის წინააღმდეგ ომს აპრილიდან ხელმძღვანელობდა, გენერალ-პოლკოვნიკმა სერგეი კუზოვლევმა შეცვალა.

სერგეი კუზოვლევი რუსეთის მოქალაქეა. ის 2014 წელს დანიშნეს ლუგანსკის რეგიონის ოკუპირებული ტერიტორიის ეგრეთ წოდებულ „სახალხო მილიციის“ უფროსად.

2021 წლის იანვარში პუტინმა მას გენერალ-პოლკოვნიკის წოდება მიანიჭა. ადრე ოკუპანტი მსახურობდა საჰაერო თავდაცვის შტაბის უფროსად, 2020 წლის ნოემბრიდან 2021 წლის თებერვლამდე კი მეთაურობდა რუსულ დაჯგუფებას სირიაში.

ჩეჩნეთის მეთაურმა, რამზან კადიროვმა დაწერა, რომ საჰაერო თავდაცვის მეთაურის მოვალეობის შემსრულებელი სერგეი კუზოვლევი 23 ივლისს ჩეჩნეთს ეწვია ბატალიონ „ახმატის“ შესამოწმებლად.

საინტერესოა, რომ გენერალ-პოლკოვნიკის ვიზიტი და კადიროვის ძალების ინსპექტირება მოხდა ორი დღის შემდეგ, რაც კადიროვმა განაცხადა, რომ ამ ბატალიონის გაგზავნას უკრაინაში აპირებენ. სამხედრო ექსპერტები თვლიან, რომ ეს შესაძლოა მიუთითებდეს იმაზე, რომ ჩეჩნეთის რესპუბლიკაში კადიროვზე ზეწოლა იზრდება.

21 ივლისს, ანტიკადიროვულმა ბატალიონმა „შეიხ მანსურმა“ გამოაცხადა, რომ აპირებს აჯანყებას კადიროვის რეჟიმის წინააღმდეგ და იჩქერიის დეოკუპაციას. უკრაინული მედიის ცნობით, სწორედ ამიტომ სავსებით შესაძლებელია, რომ ოკუპანტმა ჩეჩნეთში დატოვოს ახლახან შექმნილი „ახმატის“ ბატალიონები „ადგილობრივი არეულობის“ შემთხვევაში მის მოსაგვარებლად.

ამ ბატალიონს ქვეყანა ჯერ არ დაუტოვებია.

____

ამავე თემაზე:

რატომ ცვლის პუტინი გენერლებს უკრაინის ფრონტზე

მთავარი ფოტო: სერგეი კუზოვლევი

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.