რუსეთის პრეზიდენტი ხშირად ცვლის სამხედრო მეთაურებს, რადგან ისინი მისი ბრძანებების შესრულებას ვერ ასწრებენ – ასე ხსნის უკრაინის შინაგან საქმეთა მინისტრის მრჩეველი, ვიქტორ ანდრუსოვი, პუტინის გადაწყვეტილებებს.
„პუტინი გამუდმებით ცვლის მიზნებს, რომელთა შესრულებასაც მისი გენერლები უბრალოდ ვერ ასწრებენ. მაგალითად, სევეროდონეცკი, ქალაქი აიღეს, თუმცა ბევრად გვიან, ვიდრე ეს პუტინს სურდა,“ – ამბობს ვიქტორ ანდრუსოვი.
მინისტრის მრჩეველი ყურადღებას ამახვილებს ბოლო გადაწყვეტილებაზე – პუტინმა უკრაინაში რუსეთის ძალების მეთაურობას ჩამოაშორა გენერალი ალექსანდრ დვორნიკოვი, რომელიც მისი უახლოესი გარემოცვის წევრად მიიჩნეოდა.
„ძალიან ნიშანდობლივია, რომ პუტინი იწყებს ცვლილებებს თავის ახლო გარემოცვაში. დვორნიკოვი ასეთი იყო. ეს ნიშნავს, რომ ის უძლურებას განიცდის,“ – მინისტრის მრჩევლის შეფასებით, მსგავსი საკადრო გადაწყვეტილებები მომავალშიც იქნება, თუმცა ისინი ომში „სერიოზულ სხვაობას ვერ შექმნის“.
„უნდა გვესმოდეს, რომ ყველა ეს ადამიანი ერთნაირი სამხედრო აზროვნებისაა, ერთნაირი მიდგომების კულტურაში გაიზარდნენ, შესაბამისად, ცხადია, გენერლების ცვლილებით განსაკუთრებული შედეგი არ დადგება“.
რამდენიმე დღის წინ უკრაინის ფრონტზე მეთაურების გადაადგილებაზე წერდა დიდი ბრიტანეთის დაზვერვა, რომელიც აღნიშნავდა, რომ ივნისის დასაწყისიდან რუსეთის უმაღლესმა სარდლობამ რამდენიმე გენერალს უკრაინის ომში გადამწყვეტი ფუნქციები ჩამოართვა.
დაზვერვა ასახელებდა საჰაერო-სადესანტო ძალების მეთაურს, გენერალ-პოლკოვნიკ ანდრეი სერდიუკოვს და არმიის სამხრეთის დაჯგუფების მეთაურს, გენერალ ალექსანდრ დვორნიკოვს. დვორნიკოვი, დაზვერვის ცნობით, გარკვეული დროის განმავლობაში მთავარი ოპერატიული მეთაურის მოვალეობასაც ასრულებდა.
აშშ-ის ომის კვლევის ინსტიტუტის ცნობით კი, პუტინმა უკრაინის „სპეცოპერაცია“ რუსეთის შეიარაღებული ძალების მთავარი სამხედრო-პოლიტიკური მიმართულების ხელმძღვანელს, გენერალ-პოლკოვნიკ გენადი ჟიდკოს ჩააბარა.
