ნეტგაზეთი • RU

ქუთაისის „მართვე“ საქართველოს ჩემპიონი გახდა ქვიშის ფეხბურთში

დღეს, 22 მაისს, ბათუმში, ქვიშის ფეხბურთში ქალთა გუნდებს შორის საქართველოს ჩემპიონატის ფინალური შეხვედრა გაიმართა ქუთაის „მართვესა“ და ხობის „კოლხეთს“ შორის.

ფინალურ შეხვედრაში ანგარიშით – 12:10 – „მართვემ“ გაიმარჯვა.

ფინალური მატჩი ბათუმში დაძაბულად მიმდინარეობდა. რამდენჯერმე ანგარიში გათანაბრდა. ბოლო, გადამწყვეტი გოლების გატანამდე უპირატესობა ხობის „კოლხეთს“ ჰქონდა, თუმცა გამარჯვება საბოლოოდ „მართვემ“ მოიპოვა.

„მართვეს“ გუნდის წევრების თქმით, ისინი თამაშის დროს ყოველთვის მაქსიმალურად იხარჯებიან. გუნდის თქმით, ისინი ყველა გამარჯვებას გარდაცვლილ თანაგუნდელს, ნინი გურგენიძეს უძღვიან. „ერთად გურგესთვის“ – ეს წარწერა გოგოებს მაისურებზეც ჰქონდათ.

„სასწაული ემოციები გვაქვს. ახლა ჩვენ საკვალიფიკაციო ეტაპზე პორტუგალიაში წავალთ მომავალ, 2023 წლის სეზონზე.

რაღაც პერიოდი „კოლხეთთან“ ვიგებდით სულ ჩვენ, რაღაც პერიოდი კი ისინი იგებდნენ. ბოლო 3-4 თამაში ზედიზედ გვიგებენ და მგონია, რომ ჩვენი შედეგი არის გარდამტეხი შედეგი, რომ შევძელით და მოვუგეთ მათ. მგონია, რომ მომავალშიც ყველა შეხვედრა ჩვენი მოგებით დასრულდება“, – გვითხრა „მართვეს“ წევრმა, მარიამ შონიამ თამაშის ბოლოს.

მარიამ შონია

„მართვეს“ კიდევ ერთი მოთამაშის, ლანა გორგაძის თქმით, „ხობი“ მათთვის ძლიერი მოწინააღმდეგე იყო და მაქსიმალურად ეცადნენ ტურნირის ღირსეულ მოგებას.

კოლხეთი „ხობის“ კაპიტანმა, ანა წულაიამ შეხვედრის დაწყებამდე გვითხრა, რომ ფინალურ შეხვედრამდე ვარჯიში ქვიშის მოედანზე ვერ მოახერხეს.

ქვიშის ფეხბურთის ფინალური შეხვედრა

ხობის გუნდი “კოლხეთი”.

ქუთაისის გუნდი “მართვე”.

ქვიშის ფეხბურთის ფინალური შეხვედრა.

ქუთაისის “კოლხეთის” მოთამაშე.

“მართვესა” და “კოლხეთის” გულშემატკივრები.

საქართველოს 2022 წლის ქვიშის ფეხბურთის ჩემპიონმა და ვიცეჩემპიონმა გუნდებმა მოიპოვეს უფლება იასპარეზონ 2023 წელს ევროპის ჩემპიონთა თასზე, პორტუგალიის ქალაქ ნაზარეში.

ნეტგაზეთის მასალების სხვა გამოცემებში გადაბეჭდვის წესი
ავტორი