ბათუმის მერიასთან მოქალაქეები საპროტესტო აქციას მართავენ. მოქალაქეები აცხადებენ, რომ ისინი უსახლკაროები არიან და მერიისგან საცხოვრებელი ბინებით დაკმაყოფილებას ითხოვენ.
587 ხელმომწერი ჰყავს განცხადებას, რომლითაც მოქალაქეებმა ბათუმის მერიას მიმართეს და კომისიის შექმნა მოითხოვეს. მოქალაქეები ითხოვენ, მერიის მიერ შექმნილმა კომისიამ შეისწავლოს უსახლკაროების პრობლემები და ისინი ბინებით დააკმაყოფილონ.
ბათუმის მერიის წინ შეკრებილები ქალაქის ხელისუფლებას სთხოვენ, რომ მათ „მეტრო ჰოლდინგის“ მიერ ბათუმში, გოგოლის ქუჩაზე, უნებართვოდ აშენებული ბინები გადასცეს.
საქმე იმაშია, რომ უკანონოდ აშენებული 9 კორპუსი „მეტრო ჰოლდინგში“ შემავალი კომპანიის კერძო საკუთრებაშია განთავსებული, ხოლო კერძო საკუთრების უფლებას საქართველოში კონსტიტუცია იცავს.
„მეტრო ჰოლდინგის“ მფლობელი, მილიონერი გალიფ ოზთურქი, რომელიც საქართველოს მოქალაქეა, ფინანსთა სამინისტროს საგამოძიებო სამსახურმა გასულ თვეში დააკავა.
დღესვე ბათუმის მერიამ მოქალაქეებს წერილობით აცნობა, რომ „მერიის მხრიდან თავისი კომპეტენციის ფარგლებში მიმდინარეობს საკითხის შესწავლა“.
„თქვენი განცხადების პასუხად, რითაც ითხოვთ ქალაქ ბათუმში, გოგოლის ქუჩაზე უნებართვოდ მშენებარე შენობა-ნაგებობების ექსპლუატაციაში მიღებასა და შემდგომ უსახლკარო მოქალაქეებისათვის გადაცემის მიზნით კომისიის შექმნას, აღნიშნულთან დაკავშირებით გაცნობებთ, რომ ქალაქ ბათუმის მუნიციპალიტეტის მერიის შესაბამისი სამსახურების მიერ უკანონი მშენებლობასთან დაკავშირებით გატარებულია და კვლავ მიმდინარეობს კანონმდებლობით გათვალისწინებული ღონისძიებების განხორციელება“, – ნათქვამია წერილში, რომელსაც ხელს ბათუმის ვიცე-მერი ლევან დავითაძე აწერს.
აქციას ორგანიზატორი აჭარის უმაღლესი საბჭოს ყოფილი წევრი, მერაბ ბლადაძე იყო.
