23-25 ივნისს, ბათუმში, საქართველოს რესპირაციულ ასოციაცია მე-5 საერთაშორისო კონგრესს ჩაატარებს. წინასწარი მონაცემებით მასში 25 ქვეყნის 1000-მდე დელეგატი მიიღებს მონაწილეობას. ბათუმში ევროპის, ამერიკის და აზიის ქვეყნებიდან41 სპიკერი ჩამოვა.
კონგრესის თემატიკა რესპირაციული მედიცინის ყველა ასპექტს მოიცავს: ონკოლოგია და ქირურგია, კრიტიკული მედიცინა და ინფექციები, ტუბერკულოზი და ასთმა, ალერგია და ფილტვის ქრონიკული დააავადებები, პედიატრია და ნეონატოლოგია. კონგრესის სამუშაო ენებია ქართული და ინგლისური სინქრონული თარგმნის უზრუნველყოფით.
აჭარის ჯანდაცვის სამინისტროს ინფორმაციით, ყველა მოხსენება ორიენტირებული იქნება პირველადი ჯანდაცვის თუ სტაციონარის პრაქტიკოს ექიმზე, მის ყოველდღიურ საქმიანობაზე.
საქართველოს რესპირაციული ასოციაცია 2004 წელს შეიქმნა. ასოციაციას დღეისათვის 850 წევრი ჰყავს. საქართველოს ყველა რეგიონში აქვს რეგიონული ორგანიზაცია. რეგულარულად უშვებს „საქართველოს რესპირაციულ ჟურნალს“, მის მიერ მომზადებულია და საქართველოს შრომის, ჯანმრთელობის და სოციალური დაცვის სამინისტროს მიერ დამტკიცებულია 8 ეროვნული გაიდლაინი სასუნთქი სისტემის დაავადებების დიაგნოსტიკის და მართვის შესახებ. ასოციაცია რეგულარულად მართავს რეგიონულ კონფერენციებს საქართველოს ყველა რეგიონში: აჭარა, კახეთი, ქვემო და შიდა ქართლი, იმერეთი, სამცხე–ჯავახეთი, სამეგრელო, გურია.
