ნორვეგიაში უკრაინისთვის „ბაირაქტარის“ დრონის საყიდლად ფულის შეგროვება დაიწყეს.
„აჩუქე ბაირაქტარი უკრაინელ ხალხს ნორვეგიელებისგან“ – მოუწოდებენ კამპანიის ავტორები ნორვეგიელებს. კამპანიის ვებგვერდზე გამოქვეყნებულ განცხადებაში აღნიშნულია, რომ ლიეტუვამ სამ დღეში შეაგროვა „ბაირაქტარისთვის“ საჭირო თანხა, პოლონეთში კი 3 „ბაირაქტარის“ თანხა რამდენიმე დღეში შეაგროვეს, ასევე – უკრაინაში.
„ჩვენ გვჭირდება 10 კრონზე ნაკლები თითოეული ნორვეგიელისგან“ – აღნიშნულია განცხადებაში.
ამ დროისთვის [19 ივლისი], 290 260 ნორვეგიული კრონი [29 ათას აშშ დოლარზე მეტი] შეგროვდა კამპანიის ფარგლებში.
„ბაირაქტარ TB2-ს“, თურქული წარმოების უპილოტო საბრძოლო საფრენ აპარატს, უკრაინის „იმედის იარაღსაც“ უწოდებენ. დრონი 2015 წლიდან გამოიყენება, მას ჰაერში დაახლოებით 24 საათი გაჩერება და 7 კილომეტრის სიმაღლიდან 2,5-დან 37,5 კილოგრამამდე მართვადი საბრძოლო მასალის მიზანში სროლა შეუძლია.
უკრაინის შეიარაღებული ძალები ეფექტურად იყენებს „ბაირაქტარის“ დრონებს რუსეთის შეიარაღებული ძალებისგან თავდასაცავად, სწორედ ამიტომ პოლონეთსა და ლიეტუვაში საგანგებოდ შეაგროვეს თანხა უკრაინისთვის ამ დრონების შესაძენად.
