ნეტგაზეთი • RU

რა არის ბაირაქტარი, რომელსაც უკრაინის „იმედის იარაღს“ უწოდებენ

„შემოდის ძლიერი რაკეტები და ტექნიკა. ჩვენ ამ ყველაფერზე ერთი პასუხი გვაქვს – ბაირაქტარი. ძალით უნდოდათ ჩვენი გაძევება და ჩვენ გავბრაზდით ამ ორკებზე, რუს ბანდიტებს მოჩვენებებად აქცევს ბაირაქტარი“ – ეს ციტატაა უკრაინული სიმღერიდან, რომელიც უკრაინელებმა თურქული წარმოების Bayraktar TB2-ს, დარტყმის უპილოტო საფრენ აპარატს მიუძღვნეს, იარაღს, რომელსაც უკრაინის შეიარაღებული ძალები რუსეთის წინააღმდეგ ომში დღემდე აქტიურად იყენებენ.

გერმანული გამოცემა Bild-ი მაღალ შეფასებებს აძლევს ბაირაქტარის შესაძლებლობებს.

გამოცემამ გამოაქვეყნა სტატია სათაურით – „უკრაინის თავდაცვა ენდობა თურქულ ტექნოლოგიას. იმედის იარაღი ბაირაქტარია“.

„ბაირაქტარის უპილოტო საფრენმა აპარატმა გაანადგურა რუსული წარმოების Панцирь С-1 სარაკეტო და იარაღის სისტემები სირიაში, სომხეთსა და ლიბიაში, ასევე გაანადგურა  დიდი რაოდენობით რუსული წარმოების სამხედრო ტექნიკა უკრაინაში“ – წერს გაზეთი.

პუბლიკაციის ავტორები აღნიშნავენ, რომ ბაირაქტარის უპილოტო საფრენი აპარატის გავლენა უკრაინაში საომარი მოქმედებების შედეგზე ჯერ არ არის დადგენილი.

გამოცემაში მოცემულია ინფორმაცია თურქული წარმოების დამრტყმელი თვითმფრინავის ტექნიკური მახასიათებლების შესახებაც.

კერძოდ, ბაირაქტარს, რომელიც 2015 წლიდან გამოიყენება, შეუძლია ჰაერში დაახლოებით 24 საათის განმავლობაში გაჩერება და მართვადი საბრძოლო მასალის სროლა – 2,5-დან 37,5 კილოგრამამდე.

ბაირაქტარის დრონებს შეუძლიათ მიზანში სროლა 7 კილომეტრის სიმაღლიდან.

უკრაინამ ბაირაქტარის დრონები თურქეთიდან ჯერ კიდევ 2021 წელს შეიძინა. 2022 წლის თებერვალში უკრაინის თავდაცვის მინისტრმა განაცხადა, რომ უკრაინაში Bayraktar-ების ქარხანა აშენდება სამხედრო დრონების შესაქმნელად.

24 თებერვალს რუსეთის პრეზიდენტმა ვლადიმერ პუტინმა უკრაინაში სპეცოპერაციის დაწყების შესახებ განაცხადა. ამის შემდეგ რუსეთის არმიამ უკრაინას შეუტია. დღემდე იბომბება უკრაინის მშვიდობიანი მოსახლეობა.

6 მარტს კიევის მერმა, ვიტალი კლიჩკომ განაცხადა, რომ კიევის ზოოპარკში დაიბადა ლემური, რომელსაც ბაირაქტარი დაარქვეს.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან