უკრაინაში, რუსეთის მიერ ოკუპირებულ ქალაქ მარიუპოლში, ბიჭი უკრაინის დროშით გავიდა რუსეთის მიერ დაბომბილ დრამატულ თეატრთან.
ამის შესახებ მარიუპოლის საკრებულო წერს ტელეგრამზე და ფოტოს აქვეყნებს.
„ოკუპირებულიც კი, მარიუპოლი არ ნებდება. ახალგაზრდა უკრაინის დროშით დაბომბილი დრამატული თეატრის მახლობლად მოედანზე გავიდა. ამის გაკეთება ნამდვილი გამბედაობაა, როცა უკრაინული ენისთვისაც კი შეიძლება „სარდაფში“ ჩაგაგდონ.
ათიათასობით ადამიანი კვლავ ვერ ტოვებს ქალაქს. მაგრამ ისინი ელოდებიან და ოცნებობენ, რომ მალე მარიუპოლი ისევ უკრაინული გახდება“ – წერს მარიუპოლის საკრებულო.
ფოტო: Маріупольська міська рада/telegram
ქალაქი მარიუპოლი მთლიანად ოკუპირებულია რუსეთის მიერ.
უკრაინული მედიის ცნობით, განადგურებულია დაახლოებით 85 ათასი ადამიანის საცხოვრებელი სახლი, დაღუპულთა ზუსტი რაოდენობა უცნობია, თუმცა, წინასწარი გათვლებით, მარიუპოლში დაახლოებით 22 ათასი მშვიდობიანი მოქალაქე დაიღუპა.
ქალაქში აღარ არის კანალიზაცია და წყლის დეფიციტია, რის გამოც შიშობენ, რომ მოსალოდნელია ქოლერის ეპიდემიის გავრცელება.
