ბათუმის ბულვარის ადმინისტრაციის ინფორმაციით, ბოლო ორ თვეში ბათუმის ბულვარში 51 პირი დაჯარიმდა, შვიდს კი სიტყვიერი გაფრთხილება მიეცა.
ველობილიკის მიღმა მოძრაობისთვის დაჯარიმდა 51 ადამიანი. დარღვევა ითვალისწინებს 20 ლარით დაჯარიმებას, განმეორების შემთხვევაში კი – 50 ლარით დაჯარიმებას.
იმავე ოდენობის თანხით დაჯარიმდება პირი, რომელიც კვადროციკლით ან მოტოციკლით მოძრაობის წესებს დაარღვევს ბულვარში.
ადმინისტრაციის თქმით, ბულვარში დაამონტაჟეს გამაფრთხილებელი ბანერებიც.
ამავე პერიოდში მწვანე ნარგავების თვითნებურად მოჭრა/განადგურება/დაზიანებისთვის ადმინისტრაციული სამართალდარღვევის ოქმი ერთ პირზე შედგა. აღნიშნული ქმედება ჯარიმდება 500 ლარით.
საზოგადოებრივი ადგილების თვითნებური შეზღუდვისთვის დაჯარიმდა 5 პირი. დარღვევა ითვალისწინებს ფიზიკური პირის დაჯარიმებას 500 ლარით, იურიდიული პირის – 2 000 ლარით.
რაც შეეხება ბულვარის ტერიტორიის დანაგვიანებას, როგორც ადმინისტრაციაში ამბობენ, ხელშეკრულებების მიხედვით მოიჯარეები ვალდებულნი არიან, მათ ტერიტორიაზე უზრუნველყონ დალაგება-დასუფთავება, ასევე, განათავსონ მცირე ზომის ნაგვის ურნები.
