„ეს არის კორუფციული გარიგება, ბუნდოვანია ტენდერი, რადგან არ არის მითითებული, რომელ ავარიული სახლების აღდგენას მოხმარდება 3 მილიონი,“ – ამბობს რეზო ხარაზი, ბათუმის საკრებულოს წევრი „ნაციონალური მოძრაობიდან“. მან დღეს, 11 ივლისს, ბრიფინგი გამართა და ბათუმის მერიის ტენდერს გამოეხმაურა.
ავარიული სახლების აღდგენაზე ბათუმის მერია 4 წლის განმავლობაში 80 მილიონი ლარის დახარჯვას აპირებს. უკვე გამოვლენილია სიცოცხლისთვის საფრთხისშემცველი 118 სახლი, სადაც 3000-მდე ოჯახი ცხოვრობს.
ელექტრონული ტენდერი აუქციონის გარეშე ბათუმის მერიის კეთილმოწყობის სამმართველომ გამოაცხადა „ბათუმში, ავარიული სახლების დემონტაჟი-მშენებლობა, გამაგრება-რეაბილიტაცია ფარგლებში, არსებული ავარიული შენობა-ნაგებობების გამაგრება-აღდგენა-გაძლიერებაზე“.
ტენდერის სავარაუდო ღირებულებაა 2 მილიონ 999 973 ლარი. ელექტრონული ტენდერი ხვალ, 12 ივლისს, დასრულდება.
სატენდერო დოკუმენტაციაში მითითებულია ეს: „მიმწოდებელი ვალდებულია დავალების შემთხვევაში უზრუნველყოს ერთდროულად არანაკლებ 3 (სამ) ობიექტზე მუშაობა. ხელშეკრულება 2022 წლის 10 დეკემბრის ჩათვლით იმოქმედებს.
აქვე ნახავთ კონკრეტული სამუშაოების ჩამონათვალს, რაც ტენდერში გამარჯვებულმა კომპანიამ უნდა შეასრულოს, თუმცა არაა მითითებული, რომელ ავარიულ სახლებზე დაიწყება მუშაობა.
„დოკუმენტაციაში არ არის მითითებული, რა უნდა აღადგინონ. მერს მიანიჭეს უფლება კ2-ზე შეუზღუდავად მიიღოს გადაწყვეტილებები, რაც კორუფციის წყაროა, ახლა კი, ტენდერი ამგვარი პირობებით იძლევა ლავირებას შესაძლებლობას. სავარაუდოდ ეს ტენდერი მორგებულია კონკრეტულ ადამიანს,“ – ამბობს რეზო ხარაზი, ბათუმის საკრებულოს წევრი ენმ-დან.
ბათუმის მერიის კეთილმოწყობის სამმართველოს პრესცენტრში ამ თემაზე განმარტებას დაგვპირდნენ, თუმცა ამ დრომდე ინფორმაცია არ მოგვაწოდეს.
