დღეს, 5 ივლისს, მოსამართლე თამარ ბეჟანიშვილმა 4 წლით თავისუფლების აღკვეთა შეუფარდა ზაურ ბუდაგოვს, ხოლო 3-3 წლით დააპატიმრა გიორგი და ხუსეინ სურმანიძეები „26 მაისის ქუჩაზე კორპუსის სადარბაზოს ჩამონგრევის საქმეზე“.
2021 წლის 8 ოქტომბერს ბათუმში, 26 მაისის ქუჩაზე, საცხოვრებელი კორპუსის სადარბაზო ჩამოინგრა, რის შედეგადაც დაიღუპა 9 ადამიანი, მათ შორის, 3 ბავშვი.
პროკურატურამ ამ საქმეზე ჩამონგრეული სადარბაზოს პირველი სართულის მესაკუთრე ზაურ ბუდაგოვი დააკავა, ასევე, ხუსეინ და გიორგი სურმანიძეები, რომლებიც პირველ სართულზე სამშენებლო სამუშაოებს აწარმოებდნენ.
ზაურ ბუდაგოვს პროკურატურა სისხლის სამართლის კოდექსის 240-ე მუხლის მეორე ნაწილით ედავებოდა, რაც გულისხმობს „სამშენებლო სამუშაოს წარმოებისას უსაფრთხოების წესის დარღვევას, რამაც ადამიანების სიცოცხლის მოსპობა და მძიმე შედეგი გამოიწვია“, ხოლო სურმანიძეებს ქონების დაზიანების და სხვისი სიცოცხლის მოსპობის მუხლებით.
„ეს არის სამარცხვინო გადაწყვეტილება, ანომალია, საშიშ ტენდენციას ამკვიდრებს სასამართლო…. გამოდის, რომ ნებისმიერ ადამიანს, რომელსაც ბინაში რამე გაუფუჭდება, მაგალითად, მაცივარი და მოიყვანს ხელოსანს, ხოლო სამუშაოების დროს ხელოსანი ან ვინმე დაშავდება, მესაკუთრეს მოსთხოვენ პასუხს,“ – ამბობს ადვოკატი რამინ პაპიძე. ის ზაურ ბუდაგოვის ინტერესებს იცავს სასამართლოში და ამბობს, რომ ბათუმის საქალაქო სასამართლოს გადაწყვეტილებას აუცილებლად გაასაჩივრებს.
გამოძიების ვერსიით კი, ბათუმში, 26 მაისის ქუჩაზე მდებარე საცხოვრებელი კორპუსის პირველ სართულზე ერთ-ერთი ბინის მფლობელმა ზაურ ბუდაგოვმა ბინაში სარემონტო სამუშაოებისთვის ხუსეინ და გიორგი სურმანიძეები დაიქირავა.
„სამუშაოები ითვალისწინებდა კედლების მოშლასაც. ბინის მესაკუთრის მითითებით და უსაფრთხოების წესების უხეში დარღვევით საცხოვრებელ ბინაში სამშენებლო-სარემონტო სამუშაოები განხორციელდა, რამაც 2021 წლის 8 ოქტომბერს საცხოვრებელი კორპუსის ერთი სადარბაზოს ჩამონგრევა გამოიწვია… ბრალდებულებმა მოშალეს როგორც არამზიდი, ასევე მზიდი კონსტრუქცია (კედლები), რითაც დაირღვა საცხოვრებელი კორპუსის სიმტკიცე და მდგრადობა, რამაც გამოიწვია შვიდსართულიანი კორპუსის ნგრევა, რასაც შედეგად მოჰყვა ამავე კორპუსში მყოფი 9 პირის, მათ შორის, სამი არასრულწლოვნის გარდაცვალება და უძრავი და მოძრავი ქონების განადგურება“, – ამბობდა პროკურატურა.
ადვოკატი რამინ პაპიძე მიიჩნევს, რომ ამ შემთხვევაში საკანონმდებლო ხარვეზია, რადგან რეგულირება ეხება სამშენებლო სფეროს და არა ბინაში ჩატარებულ სამუშაოებს.
„კანონი უნდა იყოს მკაფიო და კონტროლირებადი, დაურეგულირებელია ეს თემა,“ – გვითხრა ადვოკატმა რამინ პაპიძემ.
ამ თემაზე:
https://batumelebi.netgazeti.ge/news/389231/
