უკრაინის პრეზიდენტის მრჩეველი, მიხაილო პოდოლიაკი, ქვეყნებისთვის იარაღის ქონის აუცილებლობაზე წერს. მისი თქმით, რწმენა, რომ დიდი ომების ერა დასრულდა და შეიარაღებიდან ტექნოლოგიასა და კომფორტში ინვესტირებაზე შეგვიძლია გადავერთოთ, მცდარია და ამას მოწმობს 2022 წელი.
პოდოლიაკის თქმით, „თუ შენ არ გაქვს რაკეტები – მტრის რაკეტები მოვა“.
„მსოფლიოს სჯეროდა, რომ დიდი ომების ერა დასრულებული იყო. ტანკები ჩანაცვლდა ტექნოლოგიასა და კომფორტში ინვესტიციებით. 2022 ამტკიცებს: კარგს უნდა შეეძლოს თავის დაცვა. თუ შენ არ გაქვს რაკეტები – მტრის რაკეტები მოვა. სიკვდილითა და რუსული საკონცენტრაციო ბანაკებით“, – წერს მიხაილო პოდოლიაკი.
The world believed that the era of great wars has ended. Tanks were replaced by technology and comfort investments.
2022 proves: the good must be able to protect itself. If you do not have missiles – enemy’s missiles will come. Followed by death and Russian concentration camps.— Михайло Подоляк (@Podolyak_M) July 3, 2022
უკრაინის პრეზიდენტის მრჩეველი, ადრე, რამდენჯერმე გამოეხმაურა იმ ფაქტს, რომ უკრაინამ საბჭოთა კავშირის დაშლის შემდეგ, 1994 წელს უარი თქვა ბირთვულ იარაღზე და გაანადგურა მის საკუთრებაში არსებული შეიარაღება.
1994 წლის უსაფრთხოების გარანტიის ბუდაპეშტის მემორანდუმის მიხედვით, რუსეთის ფედერაცია, გაერთიანებული სამეფო და ამერიკის შეერთებული შტატები, იღებდნენ რიგ პასუხისმგებლობებს, უკრაინის უსაფრთხოების უზრუნველსაყოფად, ისევე, როგორც ადასტურებდნენ უკრაინის ტერიტორიულ მთლიანობასა და სუვერენიტეტს და ხელს აწერდნენ, რომ მათი იარაღი არასდროს იქნებოდა გამოყენებული უკრაინის წინააღმდეგ, გარდა თავდაცვის მიზნისა.
შესაბამისად, მიხაილო პოდოლიაკი წერდა, რომ უკრაინის სამხედრო დახმარების ვალდებულება ამ მემორანდუმით არსებობს.
უკრაინა, როგორც საბჭოთა კავშირის ერთ-ერთი ყველაზე დიდი ქვეყანა, საბჭოთა ბირთვული შეიარაღების დაახლოებით 1/3 ნაწილს ფლობდა. რუსეთი, 24 თებერვალს უკრაინაში სრულმასშტაბიანი შეჭრის შემდეგ, აცხადებდა თითქოს უკრაინას ბიოლოგიური და ბირთვული იარაღი ჰქონდა. აღნიშნული ბრალდებები არ დასტურდება და დეზინფორმაციად და პროპაგანდად მიიჩნევა, რომლის მიზანიც უკრაინაზე თავდასხმის გამართლებაა.
რუსეთი უკრაინაში 24 თებერვალს გამთენიისას შეიჭრა და სრულმასშტაბიანი ომი დაიწყო.
