ნეტგაზეთი • RU

ბათუმის მე-10 სკოლის ეზოში ახალ კორპუსს ააშენებენ – პროექტზე კონკურსი გამოაცხადეს

ბათუმის მე-10 საჯარო სკოლის ტერიტორიაზე, დამატებით, ახალ შენობას ააშენებენ. ახალი შენობის პროექტისა და მშენებლობისთვის საჭირო ხარჯთაღრიცხვის დოკუმენტის მოსამზადებლად კი, აჭარის ბიუჯეტიდან 100 ათასი ლარია გამოყოფილი. ამ თანხით შესაბამისი მომსახურების შესყიდვაზე კონკურსი აჭარის განათლების სამინისტრომ უკვე გამოაცხადა.

მე-10 საჯარო სკოლის დამატებითი შენობა 3-სართულიანი უნდა იყოს. მოსწავლეთა სავარაუდო რაოდენობით – არანაკლებ 600 [25 მოსწავლე ერთ კლასში].

შენობა უნდა მოიცავდეს ასევე შემდეგ სივრცეებს [შესაძლებელია ცვლილებები შესაბამისი დასაბუთებით]: არანაკლებ 24 საკლასო ოთახი [ერთი საკლასო ოთახის ფართობი 45 – 50 კვ.მ-ის ფარგლებში]; დამლაგებლის ფართობი სველი წერტილით და სადეზინფექციო სათავსოთი; სანიტარული კვანძები მოსწავლეებისთვის, ადმინისტრაციისა და შშმ პირებისათვის; ფოიე [გარდერობით], დერეფანი, სარეკრეაციო ზონები.

შენობაში უნდა დამონტაჟდეს ლიფტი შეზღუდული შესაძლებლობის მქონე პირთათვის ყველა სართულზე მისაწვდომობით. მოეწყოს სპორტული და სააქტო დარბაზები [სასურველია]; დამატებით პირობებში კი, ტერიტორიის კეთილმოწყობა და ღია სპორტული მოედნის [ტრიბუნებით] მოწყობაც შედის.

ახალი სასწავლო კორპუსი ბათუმში მე-10 სკოლის იმ შენობის უკან არსებულ ტერიტორიაზე უნდა აშენდეს, რომელიც ჯავახიშვილის ქუჩის 66 ნომერში დგას. სკოლის არსებული შენობის უკან მდებარე ტერიტორია კი, ჯამში, დაახლოებით, 3 500 კვადრატული მეტრია.

ბათუმის მე-10 საჯარო სკოლა და ტერიტორია [წითელ ფერში], სადაც ახალი შენობა უნდა აშენდეს / ჯავახიშვილის ქუჩაზე

კონკურსში წინადადებების მიღება 13 ივლისს დაიწყება და 18 ივლისს დასრულდება. კონკურსში გამარჯვებულმა კი ახალი შენობის პროექტი და ხარჯთაღრიცხვა 4 თვეში უნდა მოამზადოს. ამის შემდეგ სამინისტრო მშენებლობაზე ტენდერს გამოაცხადებს.

მე-10 საჯარო სკოლაში ბათუმის მე-16 საჯარო სკოლის მოსწავლეებიც სწავლობენ, ვინაიდან მე-16 სკოლის შენობა 2021 წლის აპრილში იმდენად დაიბზარა, რომ შეფასდა, როგორც ბავშვებისთვის სახიფათო.

მე-16 სკოლის ადგილას ახალი შენობის ასაშენებლად 15 969 157 ლარია გამოყოფილი ბიუჯეტიდან და მშენებლობაზე ტენდერია გამოცხადებული. პირობის მიხედვით მე-16 სკოლის ახალი შენობის მშენებლობა 2025 წელში უნდა დასრულდეს.

ამ თემაზე:

15,9 მილიონი ლარი ბათუმის მე-16 საჯარო სკოლის ახალი შენობისთვის – ტენდერი

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com