აშშ-ის არმია თანახმაა, თავისი რობოტი-ძაღლი სპოტი უკრაინაში, კიევის შემოგარენის განსანაღმად გააგზავნოს.
როგორც Foreign Policy წერს, ამერიკის შეერთებული შტატების არმია Boston Dynamics-ის ორი რობოტი-ძაღლიდან ერთს უკრაინას დაუთმობს.
გამოცემა აღნიშნავს, რომ გამნაღმველ რობოტს გამოიყენებს ამერიკული არაკომერციული ორგანიზაცია HALOTrust-ი, რომელიც ჰუმანიტარულ განაღმვით სამუშაოებს ეწევა და ტერიტორიებს ომის ფეთქებადი ნარჩენებისგან ასუფთავებს. ორგანიზაცია პოულობს საფრთხეს, ნიშნავს ადგილებს, ადგენს რუკებს და წმენდს ტერიტორიას აუფეთქებელი ნაღმებისგან.
„სპოტს შეუძლია აუფეთქებელი საბრძოლო მასალები, მაგალითად, კასეტური ბომბები, გადაიტანოს ორმოში, რომელშიც სხვა მასალებია თავმოყრილი. ამით გამნაღმველებს საშუალება ეძლევათ, ისინი სამოქალაქო დასახლებებისგან შორს, უსაფრთხოდ ააფეთქონ“, – აღნიშნავს გამოცემა.
რობოტი სპოტი/ფოტო: Boston Dynamics
Boston Dynamics-ის რობოტი ძაღლი ერთხელ უკვე იმყოფებოდა და მუშაობდა უკრაინაში. 2020 წლის ოქტომბერში ის ჩერნობილში რადიაციის დონეს ზომავდა.
17 ივნისს უკრაინის შინაგან საქმეთა მინისტრმა, დენის მონასტირსკიმ განაცხადა, რომ უკრაინის ტერიტორიის განაღმვით სამუშაოებს სულ მცირე ერთი წელი მაინც დასჭირდება.
