NATO-ს გენერალური მდივანი იენს სტოლტენბერგი დარწმუნებულია, რომ ალიანსი და მისი მოკავშირეები უკრაინისთვის შეიარაღების მიწოდებას მანამდე გააგრძელებენ, ვიდრე ეს საჭირო იქნება.
სტოლტენბერგმა ეს განცხადება Politico-ს მიერ ორგანიზებულ ღონისძიებაზე გააკეთა.
„ვიდრე ეს აუცილებელი იქნება. ჩემი გზავნილია, რომ ჩვენ მზად უნდა ვიყოთ გრძელი გზისთვის. ზუსტად ვერ ვიტყვი, რამდენ ხანს გაგრძელდება ეს ომი, მაგრამ უბრალოდ ვეუბნები იმ ადამიანებს, ვინც NATO-ს დედაქალაქებში გადაწყვეტილებას იღებენ, რომ ჩვენ გვაქვს პოლიტიკური და მორალური ვალდებულება მხარი დავუჭიროთ უკრაინას დიდი ხნის განმავლობაში. ჩვენ უნდა გავაგრძელოთ თანამედროვე შეიარაღების, მძიმე შეიარაღების მიწოდება“, – აღნიშნა იენს სტოლტენბერგმა.
მან ხაზი გაუსვა, რომ უკრაინაში ომი, ფაქტობრივად, 2014 წელს დაიწყო, როდესაც რუსეთმა ყირიმი დაიპყრო და უკრაინის აღმოსავლეთით სეპარატისტებს დაუჭირა მხარი.
იენს სტოლტენბერგმა ფინეთისა და შვედეთის ალიანსში გაწევრებაზეც ისაუბრა და აღნიშნა, რომ „მისი მიზანია, ეს რაც შეიძლება მალე მოხდეს“.
