დიდი ბრიტანეთის დაზვერვის მონაცემებით, ძლიერი შეტევა გრძელდება სევეროდენცკში. რუსეთი ქალაქის დარჩენილი რაიონის დაკავებას ერთდროულად ორი მხრიდან ცდილობს – ჩრდილოეთით იზიუმიდან, სამხრეთით კი – პროპასნაიადან.
22 ივნისს გამოქვეყნებულ სადაზვერვო ცნობარში უწყება ვარაუდობს, რომ რუსეთი დონბასში დიდი რაოდენობით სარეზერვო ქვედანაყოფების გადასასროლად ემზადება.
რუსეთის ხელისუფლებას, 25 მარტის შემდეგ, საერთო დანაკარგების შესახებ ინფორმაცია არ გამოუქვეყნებია, თუმცა გაერთიანებული სამეფოს თავდაცვას მოჰყავს დონეცკის თვითგამოცხადებული სახალხო რესპუბლიკის მონაცემები, რომელთა მიხედვითაც, 16 ივნისის მდგომარეობით, დაიღუპა 2 128 და დაიჭრა 8 897 სამხედრო.
„დონეცკის დანაკარგი მისი ჯარის თავდაპირველი რაოდენობის თითქმის 55 %-ია, რაც დონბასში რუსული და პრორუსული ძალების დაუძლურებაზე მიუთითებს“, – აღნიშნავს ბრიტანეთის დაზვერვა და დასძენს, რომ დონეცკის თვითგამოცხადებული რესპუბლიკის ძალები, სავარაუდოდ, მოძველებული შეიარაღებითა და ტექნიკით არიან აღჭურვილები.
უწყების ვარაუდით, ფაქტორი, თუ რამდენად მოახერხებს ორივე მხარე სარეზერვო ქვედანაყოფების მობილიზებასა და საბრძოლო მოწყობას, სერიოზულ გავლენას იქონიებს ომის შედეგებზე.
უკრაინის გენშტაბის მონაცემებით, რუსეთის დანაკარგი უკრაინასთან ომში 34 230 სამხედროა.
გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობებს ყოველდღიურად აქვეყნებს. გუშინ ბრიტანეთის დაზვერვამ დაადასტურა, რომ 17 ივნისის უკრაინამ რუსეთის საზღვაო ძალების წინააღმდეგ წარმატებით გამოიყენა დასავლეთის მიერ გადაცემული „ჰარპუნის“ ტიპის ხომალდსაწინააღმდეგო რაკეტები.
