გაერთიანებული სამეფოს თავდაცვა ადასტურებს, რომ 17 ივნისის, უკრაინამ, რუსეთის საზღვაო ძალების წინააღმდეგ, წარმატებით გამოიყენა დასავლეთის მიერ გადაცემული „ჰარპუნის“ ტიპის ხომალდსაწინააღმდეგო რაკეტები.
ამის შესახებ დიდი ბრიტანეთის დაზვერვის დღევანდელ რელიზშია ნათქვამი. უწყების ცნობით, სამიზნე, თითქმის დანამდვილებით, იყო რუსული სამხედრო-საზღვაო ბუქსირი, „ვასილი ბეხი“ რომელსაც გადაჰქონდა შეიარაღება და გადაჰყავდა პირადი შემადგენლობა ზმეინის კუნძულზე, შავი ზღვის ჩრდილო-დასავლეთ ნაწილში.
დაზვერვის შეფასებით, გადამზიდი ხომალდის განადგურება, კიდევ უფრო მეტ ლოგისტიკურ პრობლემას შეუქმნის რუსეთს, რომელიც ცდილობს, მოამარაგოს და გააძლიეროს ზმეინის კუნძულის ოკუპაციაში ჩართული თავისი ძალები.
„უკრაინის სანაპირო დაცვამ მნიშნელოვნად შეასუსტა რუსეთის შესაძლებლობა, დაამყაროს კონტროლი ზღვაში და განათავსოს თავისი სამხედრო-საზღვაო ძალები შავი ზღვის ჩრდილო-დასავლეთ ნაწილში.
ამან ასევე ხელი შეუშალა რუსეთის თავდაპირველ გეგმას, რომელიც ოდესის ოლქისთვისთვის ზღვიდან საფრთხის შექმნას გულისხმობდა“, – მიუთითებს დიდი ბრიტანეთის დაზვერვა.
„ვასილი ბეხი“ კიდევ ერთი ხომალდია, რომელიც რუსეთმა უკრაინასთან ომში დაკარგა. 24 მარტს, ბერდიანსკის პორტში ჩაიძირა სადესანტო ხომალდი „სარატოვი“, 14 აპრილს კი, უკრაინის შეიარაღებული ძალების თავდასხმის შედეგად, მწყობრიდან გამოვიდა და ჩაიძირა სარაკეტო კრეისეი „მოსკვა.“
სწორედ „მოსკვას“ დაკარგვის შემდეგ დაიწყო რუსეთმა შავ ზღვაში თავისი ფლოტის გაძლიერება. ჯერ კიდევ აპრილში, ბრიტანეთის დაზვერვა წერდა, რომ ასეთი დანაკარგების შემდეგ, რუსეთს შავ ზღვაში თავისი პოზიციების გადახედვა მოუწევდა.
მთავარი ფოტო: “ჰარპუნის” ტიპის ხომალდსაწინააღმდეგო რაკეტა/ფოტო: US Navy
