ლუგანსკში რუსმა სამხედროებმა საევაკუაციო ავტომობილი დაცხრილეს, დაიღუპა ფრანგი ჟურნალისტი – ამის შესახებ ტელეგრამარხზე ლუგანსკის ოლქის სამხედრო ადმინისტრაციის ხელმძღვანელმა, სერგეი გაიდაიმ დაწერა.
მისი თქმით, ეს იყო ჯავშნიანი ავტომანქანა, რომელსაც ოლქიდან ათამდე ადამიანი უნდა გამოეყვანა.
„ჭურვის ნამსხვრევებმა მანქანის ჯავშანი გატეხა. სასიკვდილოდ დაიჭრა ფრანგი ჟურნალისტი, რომელიც ევაკუაციის შესახებ მასალას ამზადებდა. პატრულის თანამშრომელი ჩაფხუტმა გადაარჩინა“, – წერს გაიდაი.
სამხედრო ადმინისტრაციის ხელმძღვანელმა ჟურნალისტის აკრედიტაციის მოწმობის ფოტოც გამოაქვეყნა. ფრედერიკ ლეკრერ იმჰოფი BFM TV-ს რეპორტიორი იყო.
უკრაინის შეიარაღებული ძალების მიერ გაცემული აკრედიტაცია. ფოტო/სერგეი გაიდაის ტელეგრამარხიდან
მომხდარის გამო ლუგანსკის ოლქიდან მოქალაქეთა ევაკუაცია შეჩერებულია. ოლქის 95 % ამჟამად რუსეთის ოკუპაციის ქვეშაა. უკრაინა მხოლოდ ქალაქებს – სევეროდენცკსა და ლისიჩანსკის აკონტროლებს.
მთავარი ფოტო: დაცხრილული ავტომანქანის საქარე მინა/ სერგეი გაიდაის ტელეგრამარხიდან.
