30 მაისის მონაცემებით, უკრაინაში, ლუგანსკის ოლქის ქალაქ სევეროდონეცკის გარეუბანში, რუსეთის შეიარაღებული ძალები გამოჩნდნენ, ბრძოლები უკვე ქალაქის ქუჩებში მიმდინარეობს.
ლუგანსკის რეგიონული სამხედრო ადმინისტრაციის ხელმძღვანელი, სერგეი გაიდაი ამბობს, რომ ქალაქში მდგომარეობა „ძალიან მძიმეა“, დანგრეულია სევეროდონეცკის ინფრასტრუქტურა, საბინაო მარაგის 60% საცხოვრებლად უკვე გამოუსადეგარია. ქალაქში არ არის ელექტროენერგია, გაზი და წყალი.
სერგეი გაიდაიმ დღეს ტელეკომპანია „1+1“-ის ეთერში განაცხადა, რომ ქალაქში გვამების სუნია, ქუჩებში ბევრი რუსი ჯარისკაცის ცხედარია, რამაც ცხელ ამინდში შესაძლოა ინფექციების განვითარება გამოიწვიოს.
მისივე თქმით, სევეროდონეცკში სამი ექიმი დაიკარგა, იპოვეს მხოლოდ დაზიანებული სასწრაფო დახმარების მანქანა, რუსული ჭურვების შედეგად დაიღუპა 2 ადამიანი, რომლებიც კორპუსის ეზოში საკვებს ამზადებდნენ.
ქალაქი სევეროდონეცკი ლუგანსკის ოლქში მდებარეობს, ქალაქში 100 ათასზე მეტი ადამიანი ცხოვრობს.
ამავე თემაზე:
აჯობებს უკრაინელებმა დროულად გამოიყვანონ დანაყოფები შესაძლო ალყის ზონებიდან – ინტერვიუ
