რუსეთის მიერ უკრაინის პორტების საზღვაო ბლოკადამ უკვე გამოიწვია მსოფლიოში მარცვლეულის ფასის ზრდა – ნათქვამია დიდი ბრიტანეთის დაზვერვის 25 მაისის პოსტში, ტვიტერზე.
უწყება მიუთითებს, რომ ომის დაწყების შემდეგ ოდესიდან და ოდესაში ძალიან შემცირდა ტვირთის გადაზიდვა, შავ ზღვაში უკრაინის პორტების ბლოკადამ კი რეგიონში სავაჭრო ოპერაციები შეაჩერა.
„უკრაინის ექსპორტის საავტომობილო და სარკინიგზო ტრანსპორტით გადაზიდვები, დიდი ალბათობით, ვერ ჩაანაცვლებს საზღვაო გადაზიდვების მოცულობას და ვერ შეავსებს რუსული ბლოკადით გამოწვეულ დეფიციტს. შედეგად, დეფიციტში რჩება უკრაინული მარცვლეული, ექსპორტის შესაძლებლობის გარეშე. თუ რუსეთის ბლოკადა კვლავაც ხელს შეუშლის კომერციულ გადაზიდვებს უკრაინის პორტებში, გაგრძელდება ფასების ზრდა ბევრ ძირითად პროდუქტზე“, – წერს ბრიტანეთის დაზვერვა.
უკრაინის ხელისუფლებამ არაერთი განცხადება გააკეთა იმის შესახებ, რომ რუსეთმა ასობით ტონა მარცვლეული მოიპარა და გაიტანა უკრაინიდან.
საერთაშორისო საზოგადოება განიხილავს გზებს, როგორ შეიძლება მიაღწიოს უკრაინული მარცვლეულის განბლოკვას. ევროკავშირმა უკვე გამოხატა თავისი მხარდაჭერა უკრაინის ექსპორტზე გადასახადებისა და კვოტების მოხსნით, გერმანიის მთავრობამ კი განაცხადა, რომ უკრაინასთან „მარცვლეულის სარკინიგზო ხიდის“ შექმნაზე მუშაობს.
მთავარი ფოტო: ოდესის საზღვაო სავაჭრო პორტი. ფოტო პორტის ფეისბუქგვერდიდან
