ნეტგაზეთი • RU

რუსებმა 100 მილიონი დოლარის მარცვლეული მოიპარეს – უკრაინის აგრარული კომიტეტი

უკრაინის უმაღლესი რადა და რადას აგრარული და მიწის პოლიტიკის კომიტეტი განცხადებას ავრცელებენ, სადაც აღნიშნულია, რომ რუსეთის სამხედრო თავდასხმის შედეგად მსოფლიო სასურსათო წესრიგი დაირღვა.

„უკრაინა მსოფლიოს მარცვლეულის უმსხვილეს ექსპორტიორთა სიაშია. გლობალური სასურსათო უსაფრთხოება დაირღვა, რაც რუსეთის აგრესიითაა გამოწვეული და არა იმიტომ, რომ უკრაინას არ სურს შეასრულოს საკვების ექსპორტზე საკუთარი ვალდებულებები. გლობალური სასურსათო უსაფრთხოების რღვევა არც ჩვენი საერთაშორისო პარტნიორების სანქციებითაა გამოწვეული აგრესორის წინააღმდეგ“- წერია ოფიციალურ განცხადებაში.

ამავე განცხადებაში აღნიშნულია, რომ რუსეთის მიერ უკრაინის საზღვაო პორტების ბლოკირებამ უკვე გამოიწვია მსოფლიო ბაზრებზე ხორბლის, სიმინდისა და მზესუმზირას ზეთის ფასების მკვეთრი ზრდა.

აგრარული და მიწის პოლიტიკის კომიტეტის განცხადებით, უკრაინა მსოფლიოში 400 მილიონზე მეტ ადამიანს აწვდის საკვებს. ომის პირობებში კი, უპირველეს ყოვლისა, ახლო აღმოსავლეთისა და აფრიკის ქვეყნები ვერ შეძლებენ მიიღონ უკრაინისგან საექსპორტო სასოფლო-სამეურნეო პროდუქტები. განცხადებაში ნათქვამია, რომ უკრაინა ვეღარც ევროპას აწვდის პროდუქტების ნაწილს.

აგრარული და მიწის პოლიტიკის კომიტეტისა და უმაღლესი რადას ინფორმაციით, რუსეთმა უკვე ძარცვით გაიტანა უკრაინიდან 100 მილიონი დოლარის ღირებულების, დაახლოებით 500 ათასი ტონა მარცვლეული.

ამავე განცხადების მიხედვით უკანონოდ იქნა ექსპორტირებული ათიათასობით ტონა მზესუმზირას ზეთი, უკრაინელ ფერმერებს კი ოკუპანტებმა მიტაცებულ ტერიტორიებზე სასოფლო-სამეურნეო ტექნიკა მოპარეს ან გაუნადგურეს.

ამავე თემაზე: 

გემი, რომელსაც უკრაინაში მოპარული ხორბალი გადაჰქონდა, სირიაში შევიდა – AP

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com