ნეტგაზეთი • RU

ქობულეთის მერიას პლაჟი აუქციონზე გააქვს, ბათუმში ეს საკითხი ჯერ არ გადაუწყვეტიათ

საკურორტო სეზონზე კომერციული გამოყენებისთვის ქობულეთის მერია ნაკვეთებს პლაჟზე ერთი წლის ვადით გაასხვისებს. შესაბამისი ელექტრონული აუქციონების გამოსაცხადებლად თანხმობისთვის მერიამ საკრებულოს მიმართა. საკითხს ჯერჯერობით საკრებულოს კომისიებში განიხილავენ, შესაბამისი დასკვნების შემდეგ კი, მას სხდომაზე გაიტანენ დასამტკიცებლად.

გარდა ამისა, ქობულეთის მერიამ საკრებულოს მიმართა, განსაზღვროს ქობულეთის პარკში არსებული ამფითეატრის საიჯარო წესით გასხვისების საფასური.

საკრებულოში გადაგზავნილი დოკუმენტების მიხედვით, ქობულეთის მერია ფიზიკური პირების მოთხოვნის საფუძველზე საიჯარო წესით გაასხვისებს ფართობებს მუნიციპალიტეტის საკუთრებაში არსებულ შენობებში.

ბათუმის ბულვარის ადმინისტრაციაში კი გვითხრეს, რომ დაზუსტებით ჯერ ისევ არ იციან, გაიტანენ ნაკვეთებს პლაჟზე ელექტრონულ აუქციონზე, თუ ისევ იმ მოიჯარეებს გაუგრძელებენ ხელშეკრულებებს, რომელთა ხელშეკრულებებსაც ვადა გაუვიდა.

გასულ წელს ბულვარის ადმინისტრაციამ პანდემიის მიზეზით ახალი აუქციონები არ გამოაცხადა და მოიჯარეებს ხელშეკრულებები ერთი წლის ვადით გაუგრძელა.

პლაჟების, ასევე პლაჟთან არსებული ტერიტორიების ასათვისებლად საკურორტო სეზონზე კონკურენცია თითქმის ყოველთვის მაღალია. ეს ცოტა ხნის წინ ბათუმის ბულვარში ორი შენობისა და მასთან დაკავშირებული ნაკვეთების გასასხვისებლად გამართული ელექტრონული ვაჭრობის დროსაც გამოჩნდა.

ბათუმის ბულვარის გასწვრივ პლაჟის გარკვეული ნაწილი გრძელვადიანი იჯარის წესითაც არის გასხვისებული.

ნეტგაზეთის მასალების სხვა გამოცემებში გადაბეჭდვის წესი
ავტორი